NPA no ta partisipá na reunion di koalishon mas!

WILLEMSTAD – “Partido Niun Paso Atras no ta bai niun reunion mas ku ta konvoká pa partidonan di koalishon. No tin sentido tampoko vota, si bo sa kaba ku ta mayoria ta disidí kiko ta pasa. Nos no ta dispuesto pa partisipá mas na e sirko aki”, esei ta loke lider di e partido Nelson Pierre a anunsiá durante e reunion di ayera pa diskutí futuro di Refineria Isla.
El a bisa, ku tur esnan ku ta sigui desaroyo mundial di e problema energétiko mester ta di akuerdo, ku ta trata aki di un problemátika hopi kompleho pa dil kuné.
Nelson Pierre a para ketu ekstensamente na un diskurso ku presidente di Venezuela Hugo Chávez Frias a tene e anochi promé relashoná ku e tenshon ku ta eksistí entre Venezuela i Colombia na e momentunan aki.
“Lagami bisa mesora ku e diskurso di presidente Chávez a kondusí mesora na un oumento di preis di krudo”, Pierre a anunsiá.
Pierre a bisa, ku ta trata di un diskurso di 5 ora i ku ta bon pa gobièrnu antiano i di Kòrsou buska un kopia pa tur hende sa kiko ta pasando.
“Tin un kantidat di desaroyo ta tumando lugá ku ta di transendental importansia pa nos. Ta di lamentá ku nos no ta dedikando atenshon na e kosnan aki”, el a bisa.
Pierre a bisa, ku ni maske kon bon prepará e yega pa diskutí kontenido di e tema ku ta tratando, ta reakshon superfisial tin semper.
“Ta kuestion di rekòrdá bo kiko b’a hasi den pasado, kuantu voto b’a haña, si bo tin derechi di ta den Konseho Insular i un kantidat di kos ku ta totalmente irelevante pa e diskushon. Ta kuestion di yega kamber di Konseho Insular, sende èrko, wak si telefon ta traha i pasa den korantnan lokal pa wak ken a kuestionabu, pa bo kuestion’é bèk na un nivel personal.
Ta esaki ta nos pais. Un funshonamentu riba un nivel mediokre. Un nivel mediokre, sin niun klase di formashon,” Nelson Pierre a bisa.
Pa Nelson Pierre, e medidanan ku gobièrnu a tuma pa suavisá e grupo mas vulnerabel ta medidanan normal ku bo ta tuma pa por ehèmpel frena inflashon. No tin nada nobo den e kos aki. Adaptá sueldo ta un kos normal. No tabatin nada pa reuní henter un fin di siman riba e kos ei, el a mustra.
El a bisa, ku ta bisto ku nos ta preferá di skonde pa e realidat.
“Nos ta preferá di argumentá ku presidente Chávez ta loko, en bes di buska manera di dokumentá nos mes i profundisá den e materia geo polítiko.
Nos tin un set di neo liberal pirata. Nan no sa mes kiko ta neo, te pa nan sa kiko ta liberal.
Nos a disidí ku nos no ta partisipá mas na ningun reunion ku partidonan di koalishon yama. Nos no ta partisipá mas tampoko na votashon, si tur hende sa adelantá ta kiko e resultado lo bira. Ta asuntu di 11 – 10 kaminda tur idea di oposishon ta ser rechasá sin konsiderashon. Esei ta nos forma di indiká nos protesta,” Nelson Pierre a indiká finalmente.