WILLEMSTAD – “Nos frakshon ta keda para riba ku e mihó kos awor aki ta pa bende nos refineria. Anto ami ta kere ku nos mester bende Refineria Isla promé ku novèmber awor, ora presidente di Merka George Bush baha. Nos lo por haña un mihó preis p’e e ora ei”, asina Urvin Macaay, miembro di frakshon di partido MAN den Konseho Insular a bisa ayera.
Macaay a rekòrdá ku dia Shell a bende e refineria ku nos, el a bende esaki na e suma di 1 florin. Esei lo tabata su balor e tempu ei.
“Si nos, na moda di papia bende e refineria awor aki pa 1000 heldu mes, anto nos a gana mil biaha e montante. Pero nos tin e suerte ku desaroyonan mundial a pone ku balor di e refineria awor a subi inkreiblemente. Nos por bende e refineria aki awor pa alrededor di 3 mil mion dollar”.
Macaay a bisa ku e no ta sinti ku gobièrnu ta moviendo ku e rapides nesesario a realisá e benta aki. Lógikamente ku mester pone e kondishonnan nesesario, pero no mester lubidá ku tin mas desaroyo ta tumando lugá, segun el a splika.
El a informá, ku ta konstruyendo refineria nobo awor aki i unabes ku esei ta kla, e balor di nos refineria ku tur probabilidat lo bai baha.
“Mi ke bai mas leu ainda: ami ta kere ku nos mester bende e refineria aki promé ku presidente di Merka George Bush baha na novèmber awor. E tenshon polítiko ku tin awor aki entre nos bisiñanan aki i Merka ta yuda subi balor dje refineria. Si nos no bendé promé ku novèmber, nos tin chèns ku e lo baha na preis. Esei ta mi pronóstiko,” Urvin Macaay a atvertí.
E konsehal a keda para’riba, ku Kòrsou mester purba di saka lo máksimo for di e negoshi aki.
El a bisa, ku e tin sigur tambe ku ora negoshá, ku tur e saber i eksperto ku nos tin, ku por yega tambe na un preis preferenshal pa asina por abastesé merkado lokal ku kombustibel na un tarifa ku ta muchu mas humano ku ta e kaso awor aki.
“Si nos sòru pa esun ku kumpra e refineria mes tin petroli den su pais, anto esei lo hasi e asuntu muchu mas fásil. Anto mi ta ripití: si nos por a lo ménos sera un dil ku un kumpradó promé ku novèmber ora George Bush bandoná Kas Blanku, nos ta mihó pará,” di akuerdo ku Urvin Macaay di frakshon di partido MAN den Konseho Insular.