BEICHUAN – Un movementu basta potente a kousa un avalancha serka di e episentro di e temblor mortal ku a sakudí i kousa miles di morto na Chines na prinsipio di e siman aki. E avalancha a tapa vários outo i tambe aisla vários área destruí pa e temblor den sentro di China.
Den e áreanan afektá ainda kuerponan di reskate ta topa ku víktimanan tapá kasi 96 ora despues di e temblor. Miéntras tantu e malestar di e públiko ta oumentando komo konsekuensia di morto di muchanan ku a keda atrapá ora ku nan skol a kai den otro. Despues di kuater dia ku e temblor a sakudí China, ta awor numa ta lagando kuerponan di reskate estranhero yega na e áreanan afektá.
Un di e efektonan di movementu chikitu normal despues di temblor a sakudí e provinsia di Sichuan awe. Vários vehíkulo a keda tapá, pero no ta konosí ainda si tin víktima.
Presidente Hu Jintao a realisá su promé biahe pa e área di desaster dirigiendo algun di e 13 mil sòldánan ku ta partisipando den e akshon di reskate.
“E reto ainda ta enorme, e tarea ta duru i tempu ta bai laga nos,” asina Hu a indiká. “E trabounan di ayudo ta drentando den e fase mas krítiko.
Gobièrnu chines a bisa di lo bai investigá e motibunan, pa kual tantu skol a keda destruí i kastigá fuertemente esnan responsabel pa konstrukshon defisiente.
Segun e minister di bibienda, kasi kuater mion edifisio i kas a keda destruí den e provinsia di Sichuam. Nan ta kere ku e temblor aki a kousa morto di mas ku 50 mil hende.
Ya a pasa un dia mas di loke ekspertonan ta kere ku ta e periodo di tres dia pa topa ku kualke sobrebibiente ku bida, pero apesar di esei a logra reskatá un enfermera despues di 96 ora tapá den ruina di un klínika. Otro dos persona tambe a wòrdu hañá na bida den e mesun zona.