WILLEMSTAD – Antia i Kòrsou tambe lo bai pone Teknologia di Informashon kaminda e mester ta. Esei ta e konvikshon di minister di Tráfiko i Komunikashon di Antia Maurice Adriaens despues di un bishita na Trinidad & Tobago. E pais di Karibe tin Teknologia di Informashon komo prioridat den maneho i hasta tin un mandatario spesialmente enkargá ku e sektor aki.
Durante su bishita di trabou na Trinidad & Tobago (TT), minister Adriaens i su delegashon a hasi un bishita serka minister di Atministrashon Públiko i Informashon (ICT), Kennedy Swaratsingh. Minister Swaratsingh, a mustra ku stratégikamente nan gabinete a enkarg’é ku e departamento di ICT di Gobièrnu di Trinidad i Tobago (TT). Mirando importansia ku gobièrnu ke drecha su prosesonan i su servisionan na pueblo, kambio di mentalidat i struktura di organisashon tabata nesesario. Den pasado hopi biaha nos a usa modelonan ku no ta “fit” nos. Alkontrario, nan a resulta debastador pa e organisashon en general i pe servisio ku pueblo meresé en partikular.
“Informashon ta manera e gasolin di nos organisashon di gobièrnu. Sin dje hopi proseso ta stanka i nos ministernan no por manehá pais. Mirando unda nos ke ta komo pais a base di e Masterplan, ta imposibel ku ICT no ta forma parti integral di nos maneho”, asina e Minister a splika. Minister Swaratsingh a splika, ku huntu ku su direktorado di ICT nan a traha un plan stratégiko ku yama FastForward. E plan integral aki ta akapará ICT ku transporte, ku skolnan, ku sentro di barionan, ku edukashon, ku finansa, ku agrikultura i hasta ku turista.
Riba tereno internashonal, Good Governance (bon gobernashon) ta un elemento importante den gobernashon. P’esei e gabinete di TT aktual a rekonosé e importania di ICT governance minister Swaratsingh a remarká. Vishon, liderazgo i konosementu di materia ta puntonan kardinal den e proseso aki. “A base di e plan aktual kada 18 luna mi a duna mi gabinete produktonan konkreto for di ICT. Mi ta invitá boso aki 18 luna pa bini bèk i bin mira kiko nos a desaroyá riba e nivel di aplikashon”. Esaki ta “accountability”/responsabilidat minister Swaratsingh a terminá bisando.
E bishita na TATT, ku ta e regulador di Telekomunikashon na Trinidad & Tobago, a mustra ku kambio ta sosodé rònt di nos i si nos no adaptá nos ta keda atras. Durante kombersashon ku e direktor di TATT, señor Seechechan, informashon a wòrdu interkambiá riba e tópikonan manera e.o. preis di telefòn i Internèt, kompetensia entre provedornan, kalidat di servisio, pero tambe trahamentu konhunto ku provedornan di telekomunikashon.
Mr. Thompsen, CIO di Gobièrnu di Trinidad & Tobago i su tim di 11 mènèdjer a duna e delegashon di minister Adriaens un splikashon amplio riba nan struktura di organisashon di ICT, nan erornan, e dolónan enkontrá durante kambio, nan resultadonan i tambe nan proyekshon pa e siguiente añanan.
Riba su vishon enkuanto ICT, minister Adriaens tabata korto: “Lamentablemente nos pais no tin petroli ni sèn manera Trinidad i Tobago. Pero, nos pais tambe ta bai buta ICT kaminda e mester ta. Pasobra si United Nations, ITU, CTU, otro organisashonnan internashonal i regional ta duna importansia na teknologia di informashon i komunikashon pa tur sektor, purba na para e proseso aki òf keda sin aplik’é esaki ta manera bai bèk den tempu di pika piedras. Ken ke hasi un pais òf pueblo algu asina?”, asina minister Adriaens a bisa.