Mr. Lorito ta yama tur hende un felis djabièrnè. Lorito su alanan ta un poko slap awe, produkto di un anochi kaminda nos mester a drumi riba un taki masha fini, pasobra nos kurason tabata bati duru sin fin. Tin biaha t’asina kosnan ta bai den bida.
*********
Un saludo pa Nelson Pierre ku nos a mira ayera despues di basta tempu. Nelson ta na diet pa baha kiko nos no sa. Ayera el a ninga di kome di e tremendo bufèt ku tabatin na e enkuentro anual di Refineria Isla.
*********
E enkuentro di ayera tabata masha informativo i nos kier sugerí Refineria Isla, sigur konsiderando e desaroyonan rondó di produkshon di produktonan petrolero, pa tene e seshon aki dos bes pa aña. Ta masha kos a bin dilanti ku a klarifiká hopi mas persepshon. Nos ta kontentu ku prensa (ignorante) tambe a hasi preguntanan pa nan por pone nan análisisnan den un konteksto mas realista.
*********
Loke nos a sinti ayera tabata dos kos importante. E promé ta, ku desishonnan rondó di futuro invershonnan no por warda mas. Gerente general Pedro Jimenez Yusti i su man drechi Douglas Paz tabata hopi spesífiko den esei. Na mas ku un okashon a bisa, ku mester invertí sino produktonan di e Refineria no por alkansá merkadonan mas pa nan kumpli ku normanan ku dia pa dia ta birando mas stringente. E palabra opsoleto no a kai, pero e tabata serka si!
*********
Un otro kos ku a hala nos atenshon ta, kaminda Don Pedro a bisa bon kla, ku e situashon ku Kòrsou ta den ta produkto di desaroyonan internashonal. Lubidá ku preis di petroli lo baha. E tempu ku un presidente di Merka ta duna man na un sjeik arabir i preisnan a baha a pasa masha dia, segun el a bisa. Si ta pa nos, tur medio responsabel mester a pasa e informashon aki for di awe mainta tempran pa hende komprondé ku no por otro.

Foto Lorito
*********
Un kos ku sigur ta hala atenshon ta e kontribushon ku Refineria Isla tin na nos ekonomia. Tin biaha tin hende ta papia masha fásil di sera e Refineria, pero si bo mira e sifranan real bo ta haña sa ku e “spin off” di e Refineria ta grandísimo. Ta posibel ku aki algun aña nos por biba sin e Refineria, pero pa awor aki, pa duru ku e ta zona, no tin otro alternativa sino di aseptá ku Refineria Isla ta un pilá ekonómiko importante. Esnan ku ta bisa otro ta hinkando santu den wowo di pueblo.
*********
Opviamente mester drecha e operashon i hasié mas limpi, loke ta rekerí un invershon kuantioso. Nos no ta duna den e parti aki ku tambe mester bai haña atenshon!
*********
Nos ta bai keda te aki awe. Mañan nos lo tin hopi mas den Lorito. Pasa un dushi dia pa loke ta trata e djabièrnè aki ku tur su konvulshon. Te mañan ku Dios su poder!