WILLEMSTAD – E kurá di e Warda di Polis na Punda ta un mahos bista. Polisnan a yena e kurá ku un gran kantidat di baiskel ku nan konfiská. E baiskelnan ta benta riba otro den un huki i tambe poné riba un pasashi trahá spesialmente pa hende ku un desabilidat físiko.
Algun tempu pasá Monumentenfonds a invertí diferente mion florin pa restorá e edifisio di Warda di Polis Punda. A fèrf e edifisio i dun’é un aspekto masha bunita. Sin embargo e polisnan ku ta traha na e warda a konvertí e kurá di e warda di polis den un ‘sloperij’ di baiskel konfiská. Remarkabel ta, ku nan a asta usa un pasashi spesial konstruí pa hendenan den ròlstúl i otronan ku un desabilidat físiko. Ta konosí ku un adaptashon asina ta kosta hopi plaka i ta p’esei ta lástima ku a usa e pasashi spesial akí pa stiwa baiskelnan konfiská.
No ta promé bia ku LA PRENSA ta señalá situashonnan desordená den kurá di un warda di polis. Anteriormente e kurá di e warda di polis na Rio Canario tambe tabata enormemente shushi. Minister di Hustisia David Dick, komo un di su promé akshonnan ora el a bira minister, a sòru pa a limpia e kurá i fèrf e edifisio. Den e kurá na Rio Canario tambe tabatin un ‘sloperij’ di vehíkulonan ku polis a konfiská. Asta a limpia den e kurá kaminda tin e kasnan di polis. Rondó di e diferente di e kasnan tabatin kantidat di shushi i matanan di sumpiña ku a krese.
Un bista desagradabel den kurá di un warda di polis no ta kontribuí di niun manera na un ambiente salú i agradabel pa e polisnan mes traha aden. Sin embargo e bista ta kreá pa e polisnan mes.