WILLEMSTAD – E problema di akumulashon di shushi na pia di brùg na Otrobanda ta keda eksistí. Fruta i bèrdura prosedente di e barkunan di fruta, kombiná ku sakunan di plèstik, kùp i tayó di foam, ta akumulá kantu di brùg kaminda konstantemente tin turista ta trafiká.
E problema akí ta eksistí pa dékadanan kaba i te ainda no a logra haña un solushon struktural. CPS entretantu a hür un empresa ku ta enkargá ku limpiesa di e shushi, pero tòg ta sosodé regularmente ku na momentu ku e empresa yega, ya e bista mahos a manifestá su mes kaba. Te ainda no a logra pa yega na un formulá, kaminda e bendedónan di fruta i berdura mes ta sòru pa evitá ku nan merkansia ta drif bai i kousa e shushedat.
E fotonan akí ta saká na momentu ku e empresa a kaba di yega, despues di a risibí un yamada ku atrobe tin hopi shushi.