WILLEMSTAD – E akshon di protesta di shofùrnan di bùs chikí awe mainta, a kousa un káos den tráfiko na diferente parti di Kòrsou. Kuerpo Polisial tabatin su man yen di trabou pa a regla tráfiko na e diferente krusadanan kaminda shofùrnan di bùs a blòkia kaminda.
E akshon di awe mainta a pone, ku hopi hende ku ta dependé di transporte públiko, a keda pará na bòrchinan di bùs sin por a yega nan destino. E akshonnan mes a kuminsá for di tempran mainta, ora diferente shofùr di bùs a kuminsá kore rònt den fila i asina opstakulisá e fluho di tráfiko. Den Saliña, Parera i riba Brùg Juliana, tráfiko a pega formal i polis tabatin hopi difikultat pa kita e bùsnan ku tabata stroba tráfiko. Tabatin fila riba Nijlweg ku a forma te Seru di Dòmi. Outomobilistanan ku kier a drenta Punda no por a hasi esaki di ningun manera. Ku hopi esfuerso polis a logra desviá e tráfiko i krea rutanan alternativo pa outomobilistanan por a sigui nan kaminda. Finalmente e shofùrnan a disidí, ku nan ta bai reuní na un sitio pa sigui plania nan strategia. Di e manera akí polis a haña un alivio i por a solushoná tur fila.
Hustamente awe alumnonan di diferente skol tabatin eksamen i otro pruebanan importante pa sera aña eskolar. R.K. Schoolbestuur sin embargo a informá LA PRENSA ku te ku awe mainta 10.30, no a drenta niun yamada di skolnan ku a enkontrá problema serio ku alumnonan ku a yega skol lat i mester a pasa eksamen. Awe tabata e promé dia di eksamen pa skolnan VSBO i VWO. No tabatin problema tampoko, segun R.K. Schoolbestuur, pa loke ta trata otro muchanan di skol ku masal lo a yega lat òf no a presentá na skol. E direktor di Peter Stuyvesant College, Ange Jesserun a splika, ku ta un grupo chikí di VWO a pasa eksamen awe i tur e alumnonan di VWO nan mayornan tin transporte. E preokupashon ta pa djaluna awor ora alumnonan di HAVO ta kuminsá ku nan eksamennan.
Gobièrnu a informá ku awe mèrdia lo tin un reunion urgente pa atendé ku e problema di shofùrnan di bùs mal kontentu. Mester bisa, ku e shofùrnan ta protestá pa motibu ku nan no ke un oumento di tarifa di bùs. Gobièrnu a yega na e desishon akí, relashoná ku e subida di preis di kombustibel. Sin embargo e shofùrnan no a keda kontentu ku gobièrnu a subi e tarifa di bùs sin konsultá nan. Nan mes tabata ke pa tuma otro tipo di medida ku lo no a afektá e siudadanonan ku mester hasi uso di transporte públiko. E shofùrnan ta kere, ku un oumento di tarifa di bùs lo pone ku ménos hende lo bai hasi uso di bùs chikí i nan lo skohe pa bai ku konvoi di ABC.
SITCOM tambe a akudí awe mainta na e sede di BTG ku un konvoi yen di su miembronan pa sostené e shofùrnan di bùs. Shofùrnan di diferente dòmtrùk tambe a anunsiá ku nan lo partisipá na e akshon pasó e subida di diesel a afektá nan tambe.