WILLEMSTAD – E korantnan LA PRENSA i BALA a gana e wisio sumario ku miembro di Konseho Insular pa MAN, Gerrit Schotte, a entamá kontra e dos medionan aki. Schotte a eksigí pa e dos korantnan rektifiká un publikashon ku a relatá un kiebro na un kas di Schotte, ku segun ekspertonan tabata un kiebro esená. Despues ku Schotte a entregá un claim na FATUM, e kompania a ninga e claim, alehando ku tin diferente kos ku no ta masha kla den e kiebro aki. Schotte a sinti ku a tacha su honor i bon nòmber i el a kuminsá e kaso den korte. Wes Drijkoningen a rechasá e demanda di rektifikashon, algu promé ku mèrdia awe den un sentensia adelantá. E magistrado tabata di opinion, ku debí ku den e kaso akí ta trata di un prominente mandatario, ta trata di un kaso ku sigur ta notisia pa Kòrsou i ta mas importante ku e relashon kliente/kompania di seguro. Konsekuentemente e dos korantnan tabata den nan derechi pa publiká loke a pasa. Loke si wes a remarká ta, ku e korantnan a menshoná algun kos den nan artíkulo ku no ta pará den e rapòrt di e eksperto ku a investigá e kaso di robo na kas di Schotte. Pero esei tabata aspektonan menor di e kaso ku no ta influensiá e konteksto mas amplio. Por lo demas, e korantnan tabata korekto den nan publikashon i p’esei nan no mester rektifiká manera Schotte a eksigí. Komo partido ku a pèrdè e kaso, wes a kondená Schotte pa paga gastunan di e huisio sumario.
Promé ku el a dikta veredikto, Wes tabata sin embargo mashá rabiá ku sierto miembronan di prensa ku a saka pòtrèt den Palasio di Hustisia e siman aki. Segun Wes a bisa, sakamentu di pòtrèt den korte òf grabashon por tuma lugá solamente ku pèrmit di Korte. Esei tabata establesé for di basta tempu i awor den konsulta ku Presidente di Korte a manda un atvertensia serio ku esei no ta pèrmití. Por sierto ku LA PRENSA no a publiká pòtrèt di e seshon di korte e siman aki. E úniko lugá ku por saka pòtrèt ta pafó di korte, asina Wes a ripití.
Hefe di redakshon di LA PRENSA, Mariano Heyden ku a defendé LA PRENSA den e kaso, a bisa ku despues di un par di dia di hopi preshon, awe demokrasia i libertat di prensa a vense. Ounke den mesun rosea el a remarká, ku e dos korantnan no a haña sosten di tur medio di komunikashon ni tampoko di e Asosashon Prensa Uní. Tabatin asta algun medio di komunikashon ku no a publiká e vershon di LA PRENSA ni di BALA, pero si esun di Gerrit Schotte. Heyden a bisa, ku e motibu ku LA PRENSA a gana e kaso, ta pasó den e kaso akí por papia di un produkto ku periodístikamente tabata bon investigá i responsabel, manera semper ta e kaso na LA PRENSA mas tantu posibel. Mas aleu Heyden a bisa, ku pa LA PRENSA, e kaso di Schotte no tabata un kos sensashonalista. LA PRENSA a kumpli ku tur regla di periodismo balansá i tabatin bon informantenan. Pa prensa en general esaki ta un señal ku un medio di komunikashon mester kumpli ku su ròl pa informá komunidat. Suministrá informashon korekto ta un balor grandi ku prensa ta yena den un komunidat i e balor grandi ei a vense awe, segun Heyden.
Finalmente Heyden a bisa, ku awe prensa a sali na vanguardia di komunidat, demokrasia, transparensia i a defendé su interes. E Hefe di Redakshon a bisa, ku den futuro LA PRENSA lo no bèk pa publiká tipo di kasonan aki, komo nan ta sirbi interes general. No ta bai pa e persona individual, pero pa e interes ku medionan tin ku sirbi pa vigilá tur kos pa komunidat. “Tur esnan ku sali for di e patronchi nos lo kuestioná”.
Redaktor/direktor di BALA, Richard “Chati” Constancia tambe a ekspresá su satisfakshon pa e veredikto. El a bisa, ku demokrasia a vense i e tambe a bisa ku lo no bèk pa publiká e tipo di kasonan aki ora nan presentá.