ROMA – Cicinho ta sigur ku Roma lo gana e scudetto riba e último fecha di kampionato italiano i el a bisa ku e lo tin gana di biba e fiesta na e kapital italiano si esei sosodé.
Roma a yega e último fecha di e torneo na un punto for di e lider Inter. Djadumingu e ekipo nerazzurro lo enfrentá Parma, i Roma ta kontra Catania.
“Mi bisiñanan a kontami ku tempu el a gané (e título) ku e argentino Gabriel Batistuta (2001), e hendenan a selebrá den kaya, mi ta spera ku awor lo sosodé e mesun kos”, el a deklará na prensa. E siudat e tempu ei a bisti na e kolónan hel i kòrá di nan kamisa, miéntras e restorantnan tabata ofresé platonan di spaguèti grátis, spesialmente den e barionan mas antiguo i típiko, manera Trastevere i Testacio.”Mi ta papia tiki italiano, pero mi por manda un mensahe na e tifosi i bisa nan ku mi ta sigur ku Roma lo gana e scudetto”, el a ekspresá.
E defensa brasileño a yega Roma ocho luna pasá prosedente di Real Madrid i ta kere ku su aktual klup lo por ripití e eksperensia di aña pasá di e merenguenan.
“Nos tabata tras di Barcelona, pero den final real a gana”, riba e último fecha di e torneo spañó, el a trese dilanti.
El a lamentá ousensia di su kapitan Francesco Totti, pa leshon. “Nos ta sinti su falta tantu i nos lo tabatin gana pa e ta riba kancha ku nos, pero e lo gana ku nos, spesialmente pa su historia den Roma i pasobra e ta un gran hungadó”.