WILLEMSTAD – E famoso Kurá di RASPA ta hañando mas espasio, pa warda vehíkulonan ku polis kita for di e doño. Durante kòntròlnan di tráfiko, polis sa kita vehíkulonan for di nan doño ku no ta apto pa kore riba kareteranan públiko. E vehíkulonan akí ta bai Kurá te ora e doño drecha e vehíkulo.
Pa hopi tempu kaba tin problema ku espasio den Kurá. Konstantemente polis mester para kòntròlnan di tráfiko, pasó Kurá a yena. Den algun kaso polis sa opta pa laga un kran hiba e vehíkulo na kas di e doño ku e palabrashon ku e no ta sali riba kaya mas ku e vehíkulo. E palabrashonnan akí ta nesesario, pasó no tin otro moda di hasi, i mester kita e vehíkulo for di kaminda, ounke ku e palabrashon no ta un garantia ku e doño di e vehíkulo lo kumpli.
P’esei a bira nesesario pa kuminsá traha espasio den Kurá pa asina por warda vehíkulonan ku no por ta riba kaminda públiko. Pa traha espasio, e kompania ku ta krùsh e vehíkulonan, ta trahando duru e dianan akí. Doñonan di vehíkulo stashoná den Kurá, ku laga esaki mas ku tres luna, ta pèrdè drechi riba su propiedat. Esaki ta nifiká ku e kompania ku ta krùsh, ta liber pa saka e vehíkulo for di Kurá e hib’é bai krùsh.
Esaki sin embargo no tur bia ta den benefisio di e doño di e kran ku a transportá e vehíkulo pa Kurá. Ta asina ku miéntras e vehíkulo ta den Kurá, e doño di e kran ku a transportá e vehíkulo, tin speransa ku e lo haña su gastunan di transporte pagá. Pero na momentu ku krùsh e vehíkulo, e doño di e vehíkulo no ta bai paga e transporte mas, pasó tòg e no tin su vehíkulo mas. Den e kaso akí e doño di e kran ta pèrdè sèn pasó el a traha pòrnada.
Ayera doñonan di kran a rabia i blòkia e salida di Kurá pa evitá ku e vehíkulonan lo a bai krùsh i nan lo a pèrdè nan plaka. Despues di intervenshon di polis nan mester a kita e blokeo i aseptá nan pèrdida di plaka.