Skina di Sorti, awe djasabra 17 di mei di 2008, ta kuminsá ku deseá tur hende un bon dia. Ku diputado Anthony Godett ta rekurí na e táktika di Calimero, kaminda un hende ta krea e persepshon ku ta kòmplòt tin kontra di dje i ku e kòmplòt di prosedente di esnan privilegiá, ta algu ku nos a antisipá i básikamente a alertá pe for di dia 8 di aprel den Skina di Sorti. Ta den e mesun kolumna mi a duna di konosé di a fada di e práktika polítiko mediokre ku tabata tumando lugá.
****
E informashonnan ku mi a buska riba propio forsa i analisá, kreando mapa di e aktornan i nan sirkuito di influensia, mapa di strukturanan di personalidat i nan probabel tendensia di reakshon segun mi konosementu di tendensia di komportashon di organisashon/grupo (“organizational behaviour”) tabata mustra den direkshon di un debakel inevitabel (“onafwendbaar onheil”). Lokual ta mas molestioso i peligroso den henter e situashon polítiko ta, ku hende ku mester sa mihó tambe a kuminsá di mustra síntoma di e síndrome di “denial”.
****
Mi ta reprodusí parti grandi di e kolumna di 8 di aprel 2008, ku aki aya un opservashon adishonal.
****
Tin algun organisashon polítiko, ku ta den un direkshon outo destruktivo, pasobra algun dirigente influyente di nan a kai den e turmulina di ningamentu di e realidat (“slipstream of denial”), kaminda e persepshon ku nan ke krea a bira e realidat den kual nan ta operá. Nan a inkapasitá nan mes pa resepshon di e señalnan (te hasta esnan mas evidente) di alerta, ku nan ta riba e kaminda robes.
****
Den polítika, sosten ta un kondishon fundamental. Sin sosten, implementashon di un pretenshon di gobernashon (ehekushon di plan pa yega na un mihó nivel di bida) no ta posibel. Ta sosten ta habri kaminda pa saka asiento den un kuerpo representativo, partisipá den un koalishon i aspirá signatura di un gobièrnu. Na momentu ku akshonamentu polítiko den un forma konsistente no ta kondusí na oumento di sosten, pero deterioro den sosten, sin ku ta bini kambio den e aserkamentu, e aktornan ku ta responsabel, sea no ta funshoná na haltura di nan kapasidat òf tin kapasidat limitá.
****
Pa un strategista, konosementu di leinan ku ta splika komportashon humano ta un dje instrumentonan mas prinsipal por komprondé i proyektá sierto akshonamentu. Sin e konosementu ei, e lógika tras di e mayoria di akshonamentu humano no por wòrdu detektá. Tur pero tur akshonamentu ta tuma lugá segun e lógika di e aktor. Un lógika ku ta resultado di faktornan sosio sikológiko, fakultat genétiko pa rasoná, nivel di siñansa, i kuadro di balor i norma. (Pues bo por antisipá i prepará bo mes pa reakshon di ékis aktor. Mi ta bon dokumentá!!)
****
E fakultat genétiko pa rasoná i e nivel di siñansa ta determiná e grado di rasonamentu ku e aktor, bou di kondishonnan optimal por alkansá, miéntras e faktornan sosio sikológiko i e kuadro di balor i norma ta influensiá e fakultat pa rasoná i konsekuentemente ta fiha e grado di rasonamentu ku na un determinado momento, por fèrwagt di un aktor. Den polítika, influensia di faktornan sosio sikológiko ta grandi, pasobra e mayoria di aktornan ta akshoná ku mira riba un “response” favorabel di tersera (elektorado, finansiadó, prensa, gruponan di interes, etc).
****
Un di e konsekuensianan di e influensianan sosio sikológiko di un komunidat chikitu (geográfikamente i demográfikamente) den nos práktika polítiko ta e tendensia di biba i akshoná den un mundu di engaño. Tin un tendensia molestioso pa ninga e realidat (“denial”) i pa krea i mantené persepshon ku tardi òf trempan ta spat manera un balòn trahá for di skuma di habon. Lokual na inisio ta un eskoho rashonal (impakto pa faktor sosio sikológiko) ta konvertí den un patronchi di pensa (kuadro di lógika). (PNP i PAR sa masha bon ku e kestion di koalishon di kalidat ta un fata morgana. Nan no ke atmití ku nan a hinka nan kurpa den un kos ku nan no por manehá).
****
E eskoho segun literatura ta basa riba lo siguiente: ”the denier (or part of him) has made an unconscious decision that awareness of certain feelings, needs, or thoughts is more threatening to his sense of self than the act of denial”. Si no bini un “shock” ku ta saka e aktor for di e sirkulo visioso ku e ta na punto di drenta, e ningamentu di realidat ta bira un pèrdèmentu di noshon di bèrdat i mentira. E konsenshi ta pèrdè su funshon di kòntròl. (Algun miembro di koalishon, ku formashon profeshonal ku ta kapasitá nan pa rekonosé lokual ta pasando, ku den Konseho Insular ta defendé kosnan ku simplemente no por!)
****
Lokual mester tabata un “leugentje om best wil”, ta bira un patronchi. Manera mi a splika na vários okashon, miedu ta e konsehero di mas malu ku un hende por sigui. Miedu pa konfrontá ku e realidat di momentu ta indusí diferente polítiko pa lokual ta aparentá komo é solushon (pa nan miedu) pero en realidat ta nifiká e promé peldaño den direkshon di problema serio. Spesialmente hendenan ku ta preokupá ku imágen, ta krea problema pa nan mes.
****
En bes di un kos simpel, ta resultá ku e situashon ta otro for di lokual nos a pensa, nan ta hinka nan mes den e bògtnan di mas kompliká ku bo por imaginá bo mes. Nan ta kai den un situashon di mira ku nan imágen lo enkontra ku un gòlpi. Literatura ta papia di: “the awareness was so frightening, that a temporary psychological bargain evolved into a binding contract that allows the person to suspend cognition and reason so that he is able to ignore any knowledge or evidence that alters his fantasy reality”.(“Het gaat niet over!!)
****
Den nos práktika polítiko bo por rekonosé diferente di e síntomanan ku mi ta bai sita: “In the longer-term, denial requires continued compromises with reality to maintain the pretense that "Everything is fine!" or "If only X would happen, everything would be fine!" Eventually, delusional thinking, along with paranoia and the inevitable conspiracy theories begin to take the place of rational thought in those who deny reality for long periods of time.” Si nos tin hopi aktor polítiko ku ta blo bini ku teorianan di kòmplòt, ku mester wòrdu konsiderá komo “te gek voor woorden”. (E show den Konseho Insular ta proba esaki)
****
Otronan ta kuminsá ataká tur esnan ku ta kontradesí nan ridikulesnan den forma personal. “The denier will begin distort language and logic to rationalize and justify their behavior. Eventually, cognitive strategies and rational argument will be abandoned altogether by the denier, because those strategies are not sustainable and are unable to convince others; at which point the person in denial will simply refer to his feelings or emotions as the sole justification”. (Diputado di ku e no ta pèrmití pa susha su nòmber).
****
Kasonan di agreshon verbal i menasa tambe ta basta frekuente. “The denier will feel justified in acting out against those who threaten the peacefulness of their fantasy. Problem solving and decision making will deteriorate as the entire focus of energy becomes the maintenance of the denial. In place of rational alternatives, excessive emotionality in general; and specifically anger and rage escalate toward those who are "blamed" for the reality that does not conform to the denier's worldview”. (Skina, Lorito, Amigoe).
****
Nos tin tambe algun aktor polítiko ku a yega e fase mas peligroso. “In the end, interactions with those in denial are characterized by the denier's frequent smugness; sense of superiority; arrogance; belittlement of alternative views; and undiluted hatred toward anyone or any idea that questions their worldview”. (Ta kere ku e ta mas grandi ku e sistema).
****
Den e kolumna di aprel 2008 mi a terminá ku: Mi no ta bai pone nòmber na ningun dje símptomanan ku mi a trese awe, pero ta djis manda e mensahe ku nos a hasi nos “profiling” di e diferente aktornan polítiko i ora yega e momentu ku ta konta pa nan, ku ta elekshon, esnan ku no despertá for di e delirio ku nan a hinka nan mes den dje, lo por topa ku un par di kolumna devastador pa nan pretenshon elektoral. Ami sigur a kuminsá kansa di práktika polítiko mediokre i detrimental pa desaroyo di pais.
****
Al final lo siguiente. Mi tin kompromiso ku mi mes pa kaba ku un proyekto. Si tur kos kana segun plan, mi lo tin tempu pa mustra esnan ku a buska guera ku “they are way out of their league”. Talkshow, komunikado, pamflèt, i algun mobilisashon den bario si tempu pèrmití. Mi sa ku lo mi por konta ku entre otro “Liber” den lokual nos a hasi den vários kontienda elektoral.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.