WILLEMSTAD - Grupo Monarca ta e di kuater kompania mas grandi den konstrukshon di viviendas i apartamento na Colombia i esun mas grandi na Medellin i for di 2007 a mustra na Gobièrnu Insular su interes den desaroyá un plan turístiko na Kòrsou.
Grupo Monarca ta representá pa sr. Henry Madrid, presidente, sr. Gabriel Jaime Escobar Botero, Gerente General, sr. Enrique Acevedo, direktor tékniko.
Ta trata di un plan riba un tereno di 460.000 m2 na Plantage Jeremi ku lo konsistí di e.o. un hotèl di 200 kamber, un hotèl di apartamentu di 100 unidat, 400 Apartamentunan di luho i 400 Villas vakashonal. Di e bùngalo i e Apartamento vakashonal apr. 70 % lo wòrdu destiná pa ser di hür na turista.
Originalmente e plan lo a konsistí di 1680 unidat, pero despues ku DROV a oponé su mes kontra e kantidat aki, Grupo Monarca a disidí di adaptá e plan i baha e kantidat di unidat na 1100. Grupo Monarca su punto di salida ta, ku tur stakeholder mester por haña nan mes mas tantu ku ta posibel den e proyekto. Di e manera ei un proyekto por ta eksitoso.
E proyekto lo rekerí un invershon total di 300 mion US dollar i lo generá divisa dor ku e ta ser finansiá pa un parti supstansial ku kapital estranhero. Aki ta bon pa apuntá ku Grupo Monarca mes lo sòru pa finansiamentu di hinter e proyekto i no tin mester di ningun garantia di gobièrnu.
Tambe ta importante pa menshoná, ku segun kálkulo preliminar, e proyekto lo generá mas o ménos 1000 kupo di trabou, esta 400 durante di konstrukshon i 600 di forma permanente ora e proyekto ta kompletamente kla.
Fuera di e hotèl, appartementenhotel, bùngalo i Apartamentonan vakashonal, e proyekto lo konsistí di un área di komersio pa un supermerkado, tienda di paña, restorant, etc. i ademas, si ta faktibel, un klínika.
E bishita aki di Grupo Monarca ta bira e di kuater bishita na Kòrsou. A tene un reunion di trabou ku CTDB, inklusive un representante di DROV.
Segun nan representante aki na Kòrsou, e grupo ta lamentá ku durante e reunionnan e diputadonan di infrastruktura i di turismo, pa motibu di otro kompromiso, no por tabata presente, no opstante ku ta netamente riba invitashon di Bestuurscollege e grupo a biaha pa Kòrsou. Konsiderando e magnitut i importansia di e proyekto, e invershon asina grandi ku esaki ta rekerí i e benefishinan supstansial ku e proyekto lo tin pa nos komunidat, Grupo Monarca tabatin gran ekspektativa pa bolbe topa ku maske ta un diputado durante e reunion di trabou CTDB, pero lamentablemente esei no tabata posibel.
Mester bisa, ku na último ora a logra haña diputado sr. Rhuggenaath pa un reunion ku lo mester a tuma lugá ayera nochi.
Finalisando Grupo Monarca kier duna mérito na e forma profeshonal i sumamente atento ku funshonarionan di CTB den persona di sra. Evita Nita i sr. Faisol Ayubi a atendé nan i ta hasiendo tur lokual ta den nan alkanse pa logra ku e proyekto por keda realisá na Kòrsou.
Grupo Monarca ta keda karga e optimismo, ku e proyekto aki lo por ser realisá, ya ku sin duda e lo kontribuí en grande na desaroyo ekonómiko di Kòrsou.