Mr. Lorito ta yama tur hende un felis djasabra. Danki pa tur e sosten ku nos a haña den e último dianan. Hopi no a duda den verasidat di nos informashonnan. Esnan ku a duda nos ta pordoná (pa e biaha aki). Nos a bisa na diferente okashon ku nos ròl ta pa kuestioná i duna informashon ku ta relevante pa diskushon komo korant. Den e kolumna aki tin poko mas sous, komo ku un kolumna su karakterístika ta otro. Ketu bai ainda tin hende ta pretendé di rabia ora nan lesa Lorito. Si ta pa bo rabia bo ta lesa, pon’é un banda. Abo ta felis, nos ta felis!
*********
E hecho ku PG tabata den sala ayera ora di sentensia den e kaso Schotte/LAPRENSA/BALA a hala masha atenshon. Imaginábu ku un PG ta interumpí su trabou pa e pasa wak un sentensia. Nos ta suponé ku algun hende mester a soda friu!
*********
Nos no a komprondé di kon partido MAN te awe no a duna un komentario riba e kaso Schotte. Es mas, lider di MAN tabata solidario ku Schotte (loke ta su eskoho) pero kiko e partido ta bai bisa su votadónan awor aki. Ta hopi straño, ku komo partido bo ta tene reunion pa evaluá mil i un kos, bo ta kla pa tene manifestashon i awor ku ta un kaso ku tin tendensia di mishi ku un di bo prinsipionan fundamental (MAN Limpi) si ta boca callao! Un aktitut masha remarkabel!
*********
Despues di e kaso di e siman aki pa kua LA PRENSA no a haña sosten di diferente otro medio (siendo ku pa nan tambe ta un kaso fundamental), Lorito a disidí di retirá komo miembro di Prensa Uní. Lorito no kier tende mas di e organisashon aki. Ni awor aki (e siguiente dia) ku tin un sentensia ku ta na fabor di Prensa Liber nos no a tende nada mas. Ademas masha tempu Prensa Uní no ta un organisashon dinámiko mas! Hasi nos un fabor, nos no kier niun premio mas tampoko di Prensa Uní! Saka nos for di e lista!
*********
Nos no a gusta e kobertura di e akshonnan di ayera di diferente medio. Nos no ta kere ku un medio mester yuda krea pániko ku reportahenan eksagerá. Un medio tambe tin su responsabilidat den tempunan di tenshon. Bo mester ta masha atento pa no laga ken ku ta yama i instigá! Un hende ku ta yama pa un protesta òf manifestashon mester ta un hende outorisá i no por ta kualke yamadó!
*********
Bo mester wak bon ki ta e palabranan ku bo ta usa den e tipo di situashonnan aki. Anto di eksagerashon no ta di papia mes! Ora bo ta e úniko medio den un sistema, bo responsabilidat ta bira mas grandi ainda. Por ehèmpel, televishon mester tin masha koutela kiko e ta bisa i hasi. Su influensia i impakto ta grandi.
*********
Nos no a haña ta bon idea ku tantu minister di Hustisia komo Gezaghèber a disidí pa bai Ulanda nèt den e siman ku por a antisipá akshonnan. Masha reklamo nos a tende ayera di diferente hende riba esei. Nan mes mester duna kuenta i rason pa esei. Sinembargo nos mester destaká ku Gezag interino Doña Magaly no a hasi un mal trabou. Den forma trankil i sereno el a atendé e situashon i duna su opinion. Nos tin sigur ku e lo sigui krese den e trabou. Por sierto Lorito a gusta su R. Lorito tin gana di tende kon e ta bisa Lorrrrrito!
*********
Bo a tende kaba di e hurista fuma ku a dal outo di su kasá kibra i a sigui kore. Un kaso aki tambe tin ingrediente pa bira unu sumamente mahos. Nos ta spera, ku esnan ku ta skibi na fabor di sierto huristanan lo skibi riba e kaso aki tambe. Kualke kos nan yama Lorito pa nan haña tur detaye! Nos ta keda te aki awe. Te djaluna awor ku Dios su poder!