WILLEMSTAD – Royal Caribbean Cruise Line a skohe Kòrsou pa nukleo di su aktividatnan den e área aki. E kompania mes lo paga un estudio di faktibilidat, pa kua ya kaba a kuminsá hasi e trámitenan, asina e kompania ta bisa den un karta pa promé minister Emily de Jongh-Elhage. No tabata masha kla pa LA PRENSA, di kon e karta a bai pa e mandatario antiano, siendo ku e asuntu aki ta responsabilidat primordial di Gobièrnu di Kòrsou. LA PRENSA tin informashon, ku durante un bishita di e kompania na Kòrsou a papia ku e lider di PAR.
Segun e karta, e kompania ta hopi interesá den e desaroyonan ku tin na Kòrsou i kier ta parti di e desaroyonan aki. E karta ta bisa, ku nan kontakto ku Aruba tabata ménos agradabel i p’esei nan kier pone un klóusula den e dokumentunan na Kòrsou, pa evitá loke a pasa na Aruba. Por sinti klaramente for di e korespondensia, ku e kompania no ta at-all kontentu ku e manera ku a trata nan na e isla bisiña.
For di e karta por saka’fó, ku e kompania kier hasi tur estudio den forma aselerá i manera nos a bisa, ya kaba a anunsiá, ku e fondonan pa e diferente studionan ta disponibel. Esei ta nifiká, ku e kompania ta konvensé ku realmente Kòrsou ta un oportunidat pa nan aktividatnan, loke ta ilustrá un biaha mas, ku Kòrsou ta hañando mas i mas atenshon di invershonistanan internashonal.
Anteriormente ya kaba LA PRENSA a publiká ku e kompania ta mek riba e área di Caracasbaai pa su aktividatnan. E kompania kier hasi e área aki un sentro turístiko nobo grandi ku lo komplementá otro áreanan turístiko di Kòrsou. E karta di e siman aki ta e promé kompromiso konkreto di e kompania den e direkshon ei. Awor aki a keda na outoridatnan lokal pa duna kontesta i duna lus bèrdè pa e diferente estudionan pa finalmente kuminsá ehekutá loke e kompania di renombre aki tin na bista.
LA PRENSA a komprondé, ku den seno di Gobièrnu di Kòrsou tin masha alegria pa un otro nòmber grandi ku ta interesá pa establesé na Kòrsou.