WILLEMSTAD – EFEX 2008 ta sigur un eksibishon espektakular, presentando e último avansenan riba tereno teknológiko. LA PRENSA a tuma nota di e eksibishon aki ku a kuminsá djaweps anochi di International Trade Center (ITC). Un grupo grandi di empresa riba tereno di teknologia i esnan ku a avansá riba e tereno aki ta presentando nan produktonan. Algun di nan ku nos por menshoná por ehèmpel ta UTS ku a presentá su sistema nobo di Internèt mobil ku ta kapta nos isla kompleto i nan un velosidat di 3.6 megabit. Diferente otro empresa ta hasiendo uso di teknologia avansá komo parti di e servisio na nan klientenan, manera un MCB ku ta moviendo mas i mas den Internèt banking.
Ekspertonan a koinsidí ayera, ku Kòrsou sigur ta siguiendo e desaroyonan global di serka. Loke falta ta e konsenshi serka empresanan ku si bo no ta konektá ku mundu lo bo keda atras.
E apertura tabata na enkargo di minister Maurice Adriaens (Tráfiko i Komunikashon) ku den último lunanan a bira un defensor fuerte di e konsepto pa Antia i Kòrsou sigui hasi uso di teknologia avansá. E mandatario ta bogando pa mas hende haña aseso na teknologia i ta poniendo preshon pa baha tarifanan. E minister ta hañando hopi apresio tur kaminda pa su aserkamentu moderno i inovativo.
EFEX 2008 ta tuma lugá kada dos aña. E eksibishon lo ta habrí ainda awe di 6’or pa 11’or di anochi. Mañan lo ta un dia kompleto ku ta di 11’or di mainta pa 11’or di anochi.
Tony Halabi di Destination Curaçao ku ta enkargá ku kordinashon di EFEX 2008 ta hopi satisfecho ku e progreso di e eksibishon aki ku dia pa dia ta birando mas grandi. E aña aki e eksposishon ta konta ku un spònser grandi ku ta e kompania Avaya ku su presensia ta resaltá durante e eksibishon ku a kuminsá djaweps anochi.
Un eksibishon ku sigur ta bale la pena pa bai wak, prinsipalmente pa esnan ku ta konektá ku mundu kaba. I si bo no ta konektá ku mundu ainda, a bira tempu pa bo hasi esei awor aki pa no kai atras!