WILLEMSTAD – Gobièrnu di Kòrsou a bai di akuerdo pa reuní ku e sindikato di Transporte Uní (STU) djaluna awor. Esei a pone un fin pa awor aki na e akshonnan di ayera na diferente parti di Kòrsou di parti di shofùrnan di bùs. E shofùrnan di bùs ku a reuní na sede di BTG, a sostené e desishon pa posponé e akshonnan despues di un dia agitá ayera.
Gobièrnu di Kòrsou a lamentá, ku kosnan mester a yega dje leu ei. Segun Gobièrnu, a tende di petishon pa reuní via via, pero no a aserká gobièrnu via di e kanalnan ofisial. Segun e splikashon di gobièrnu, djadumingu último Gobièrnu di Kòrsou a anunsiá algun alternativa pa aliviá e grupo di ménos rekurso relashoná ku subida di preis di kombustibel.
Entre otro a anunsiá tambe ku ta subi tarifa basá riba petishon di sindikato di shofùrnan di bùs. No opstante e petishon, di e propio sindikato na desèmber di 2007, pa oumentá tarifa, e sindikato den transkurso di siman ku a pasa a inisiá diferente akshon ku a intensivá awe.
Ayera shofùrnan di bùs a blòkia algun karetera ku a opstakulisá entradanan na diferente sitio. E blokeonan a bai den diferente forma por ehèmpel, pone bùsnan chikí blòkia kareteranan i shofùrnan di bùs a sinta abou stroba outo di pasa. Tambe na altura di parada di bus na Otrobanda a tira piedra i webu i tambe intentonan pa sende tayer i palèt na kandela. Shofùrnan di bùs a intentá na blòkia entre otro e siguiente kareteranan ku ta Seru Grandi, EEG-Weg, Cubaweg, Palu Blanku, Krusada na Schottegatweg Zuid i Noord, Oranjestraat, Grebelliniweg na altura di Wimco, Bahada di brùg Juliana, Waaigat, Krusada Pater Eeuwensweg na altura di Holiday Beach Hotel, Aeropuerto di Kòrsou.
Gobièrnu a komprondé ku STU ke papia awe ku Gobièrnu i despues di deliberá, a disidí di invitá STU i Stinusa awe tardi pa sinta papia. Apesar di esaki, tòg Gobièrnu no a tende nada di STU manera nan a primintí ku pa 5’or di atardi nan lo kontestá. Stinusa a mantené su akuerdo pa reuní djarason otro siman dia 21 di mei ku Gobièrnu manera a palabrá anteriormente. Gobièrnu ta lamentá, ku apesar ku a duna oído na petishon di STU pa papia awe, tòg nan no a kontestá.
Ta importante pa enfatisá ku den tur momentu gobièrnu ta boga pa interes general prevalesé riba interes di grupo. Esaki ta gobièrnu su prioridat. I banda di esaki ta importante pa Gezaghèber vigilá i mantené órden públiko na tur momentu pa evitá ku kosnan ta sali for di man. P’esei Kuerpo olisial i SKS ta keda pendiente pa kualke situashon i insidente ku nan mester atendé. Gobièrnu di Kòrsou ta enfatisá, ku no tin niun konflikto entre gobièrnu i sindikato STU; Gobièrnu di Kòrsou ta semper habrí pa papia pa yega na un solushon i duna tur apertura pa papia. Gobièrnu ta atendé tur petishon ku ta sali fo’i komunidat ku seriedat i ta spera esaki tambe di esnan ku ta hasi apelashon riba gobièrnu. Gobièrnu ta sigui vigilá e situashon aktual i ta keda pendiente pa kualke akontesimentu ku por surgi. Nos lo keda informá pueblo di kualke desaroyo ku ta di interes general i purba na resolvé”, asina Gobièrnu di Kòrsou a bisa. Miéntras tantu pues pa awor aki e situashon a trankilisá pendiente e reunion di djaluna awor.