WILLEMSTAD – Dia 15 i 16 di mei a tuma lugá e konferensha di turismo ‘Curaçao Challenge’ kaminda representantenan di e industria biahero ulandes i representantenan di industria di turismo di Kòrsou a diskutí e importansia di e merkado ulandes pa Kòrsou su turismo, kon mantené e popularidat di Kòrsou bou di e turista biahero ulandes i e mihó manera pa konhuntamente enfrentá e retonan relashoná ku e desaroyo riba término kòrtiku i largu.
E Curaçao Challenge aki ta un inisiativa di Ofisina di Turismo i a wòrdu organisá den koperashon ku CHATA i otro stakeholders den turismo.
Den e grupo di representantenan for di Ulanda ta figurá personanan prominente den e mundu di operadó tòp di Ulanda, operadó spesialisá i kompanianan aéreo. E grupo, banda di e oradornan, a konsistí di Martin Does (Does Travel), Mark Boekhoudt (Maduro), Marianne Romijn (Kras), Steven van der Heiden en Manfred Lahey (TUI), Rob Bremer (Silverjet) Hans Ritman (Martinair) Welmer Blom (KLM) Mike van Snek (Kuoni) Natasja Eshuijs (Travel Trend) Jan Lokhoff i Theo de Reus (Reisrevue), Rene Brouwer (BrouwerBetist) i Hans Bommer (Van der Valk).
E konferensha a wòrdu moderá pa sr. Jan Lokhoff, e redaktor en hefe di e revista prominente di turismo, Reisrevue. E orador prinsipal tabata señor Steven van der Heiden ku ta CEO di e kompania TUI Nederland. Otro oradornan durante e mainta tabata sra. Evita Nita, Direktor General di CTB, diputado di Turismo, sr. Eugène Rhuggenaath, sr. Don Werdekker di CHATA, sra. Brenda Benjamin, direktor di Merkadeo di CTB, minister di Tráfiko Aéreo, sr. Maurice Adriaens i sr. Kees van der Most, direktor di e büró di investigashon NBTC-Nipo na Ulanda.
Riba e di dos dia di konferensha a presentá algun ponensia komo resultado di un seshon será ku a tuma lugá djaweps atardi pa e invitadonan. Un panel konsistiendo di representantenan di CTB, CHATA, TUI i NBTC-Nipo a diskutí e ponensianan i kontestá pregunta di e públiko.
E konklushon prinsipal di e konferensha ta ku ainda tin un potensial grandi den e merkado hulandes ku nos por eksplotá, basta ku tur stakeholders den turismo traha huntu pa logr’é.
Den e próksimo dianan CTB lo amplia mas riba e eksitoso konferensha ‘Curacao Challenge’.