Segundo fase di Dump lo mira su finalisacion na maart 2009!

Segun Gobierno di MEP

ORANJESTAD- Un biaha mas comunidad Arubano por a experencia e curashi y determinacion di Gabinete Oduber na momento cu a surgi un retraso den implementacion di e segundo fase di e proyeco di Dump na Parkietenbos.
Hecho ta cu simannan largo nos mester a scucha acusacionann baho y vil di politiconan di AVP y RED, entre otro Benny Sevinger y Rudy Lampe, cu nunca a yega di haci algo drechi pa e pais aki y kendenan den nan frustracion y desesperacion a cuminsa tira cu lodo den direccion di nos Minister di Salubridad drs. Booshi Wever, alegando cu posibelmente corupcion a wordo practica den e bunita proyecto aki.
Manera ta bon conoci caba den tur proyecto grandi cu wordo ehecuta lo por surgi cualkier retraso y pa cu e proyecto di Dump esaki no ta un excepcion.
Den e caso aki Minister Wever a asumi su responsabilidad como e minister encarga, a percura pa trece tur e partidonan envolvi hunto, esta FDA, Bouldin & Lawson y Albo Aruba, a sinta na mesa den forma profesional y a logra un resultado sumamente positivo pa loke ta continuacion di e proyecto aki.
Awe tin un acuerdo solido firma, caminda cu e proyecto di e segundo fase di Dump lo continua cu su construccion e siman aki mes y cu poder di Dios esaki lo termina definitivamente dia 17 di maart 2009.
Aki a keda demonstra un biaha mas cu unda tin bon boluntad, integridad y honestidad semper tin solucion pa tur problema cu ocuri den cualkier proyecto.
Ta bon conoci caba pa e comunidad Arubano cu tur proyecto cu a wordo inicia door di Gabinete Oduber den e ultimo 7 añanan, esakinan tur a wordo finalisa cabalmente. Alavez henter comunidad por mira claramente unda tur nan placa di belasting a bay.
Mira por ehempel e construccion di e Centro Medico Nobo San Nicolas, e promer fase di Dump na Parkietenbos, e facilidadnan deportivo na Noord, Simeon Antonio, Jaburibari, Savaneta, tur e schoolnan cu a wordo construi y renoba, construccion di casnan social, caretera y rotondenan etc.
Den tur e proyectonan aki e promer piedra ta wordo poni y despues di algun tempo e yabi ta wordo entrega oficialmente!