A para bira un kustumber fastioso den paisnan di reino unda ta papia papiamentu pa ‘cueste lo que cueste’, buska manera pa baha e gobièrnu na mando. No ta importá di ki forma esei sosodé. E por ta traishon polítiko, interesnan di gremio òf di persona i manera nos por mira último tempu, via di akshon sindikal òf di un grupo di trahadónan. Ku tipo di akshonnan asina ta duna resultado, ta un pregunta grandi. Echo ta, ku pa dianan largu, komunidat, ku otro palabra, hendenan inosente, ta esnan ku ta sufri. Pa no papia mes di ekonomia di e isla.

Un par di siman atras, Aruba tabata na bùrt. Pa 7 siman un grupo grandi di empleado públiko a subi kaya pa demandá gobièrnu un kompensashon pa subida di kosto di bida. For di kuminsamentu tabata bisto pa esun ku dos dede di sintí ku e ’sindikatonan den akshon’, manera nan a yama nan mes, no tabatin un strategia deliniá pa logra nan meta. Esnan ku a sigui djaserka e lucha sindikal di Kámara Sindikal/SSK di 1991 na Kòrsou pa “gelijktrekking” i indeksashon di salario, lucha ku si tabatin strategia i táktika super bon deliniá, mesora a konkluí ku tabatin otro kos tras di e supuesto lucha aki. I Bingo! Despues di shete siman di akshon i wèlga, a yega na un akuerdo suavemente bisá ‘kuestionabel’ ku gobièrnu. Resultado final tabata, ku esnan ku a wèlga a pèrdè (na salario) muchu mas tantu welgando, ku e loke finalmente nan a haña. Konklushon final: e wèlga tabata mas intento, totalmente frakasá mester bisa, di oposishon pa via e akshonnan sindikal, baha e gobièrnu ku ta sintando.

Awor ta toka turno pa Kòrsou. Un gremio sindikal ku den otro ora apénas bo ta tende di nan, a kai den gara di algun polítiko super ambisioso, ku no ta ria pa usa e sirkunstansianan di mas insignifikante ku tin, pa pone preshon riba gobièrnu, den kreensha ku esaki lo sukumbí i kai. No ta muchu tempu pasá nan a pone masha ‘drama’ dilanti di e hotèlnan na Piscadera. Promé ku esei, tabata e ‘vertoning’ dilanti Konseho Insular dia ku e rechasá e ‘slotakkoord’ ku a firma ku Ulanda tokante struktura estatal.

Loke a ‘lidersitunan’ aki ta lubidá ta, ku nunka den historia akshon sindikal òf di trahadó a kondusí na kaida di gobièrnu. Ni na 30 di mei 1969. Loke tur hende ta lubidá ta ku nos leinan ta bisa bon kla, ku no por eksigí un gobièrnu demokrátikamente eligí pa baha pa medio di sirkunstansianan no demokrátiko. 30 di mei 1969, den kareda di 6’or di atardi, defuntunan Ewald Ong-A-Kwie, Colá Verhey i Amador Nita a bai Radio Hoyer pa bai lesa un deklarashon den kua nan a eksigí gabinete Kroon baha den dos biaha 24 ora. Ong-A-Kwie di miedu no por a lesa e deklarashon. Amador Nita a rank’é for di su man i a lesa esaki. E mesun anochi polis i marinier makamba a bai su kas na Sta. Maria i hib’é piskalat bou di akusashon di mina demokrasia. Finalmente tabata falta di wesu di lomba di parti di e promé minister di e tempu ei, Ciro Kroon, ku a sede pa preshon di Partido Nashonal di Pueblo (‘òf all people’!) pa entregá renunsia di su gabinete serka gobernador Colá Debrot. I tabata atrobe bou di preshon i hasta traishon di Partido Nashonal di Pueblo, ku algun siman despues a disolvé Staten i yama elekshon nobo pa sèptèmber di e aña.

I un nota pa historia tambe. Esnan ku a kere ku Partido Demokrat lo a hiba ‘vra’ pa supuestamente ‘kousa’ 30 di mei a sali nanishi largu. Di e 7 asientonan ku nan tabatin nan a pèrdè apénas 2 den e elekshon ku a sigui. Den e gobièrnu ku a forma a base di resultado di e elekshon ei, Demokrat a keda ku su mayoria den gobièrnu, ounke a skohe pa asumí un ròl mas pasivo i pèrmití PPA di Aruba karga signatura di e gobièrnu. Ta p’esei defunto Nèto Petronia a bira promé minister. Ahan! E partido ku mas a sufri den e elekshon di sèptèmber 1969 tabata e propio Nashonal ku a kai di 3 asiento bai 1. Di chiripa! Pues señora Emily de Jongh-Elhage, kedabu masha trankil!

Te otro siman ku poder di Dios.

(Mi ke sa bo komentario, krítika òf opservashon. Djis mandami un mail na bobharms@setarnet.aw)