WILLEMSTAD – “Antia definitivamente no ta un paraiso fiskal. Nos ke pa saka e mito aki pa semper for di mundu”, asina sekretario di Estado di Antia pa asuntunan fiskal mr. Alex Rosaria a enfatisá den entrevista ku Radio Nederland Wereldomroep.
Rosaria, kende ta na Ulanda e dianan aki en konekshon ku un biahe di trabou, a papia ku representantenan di Komishon Oropeo pa 4 pais oropeo kita nòmber di Antia for di e lista pretu ku ta akusá paisnan di ta evitá pagamentu di belasting den forma adekuá i di ta forma un paraiso fiskal. E paisnan aki ta Polonia, Grecia, Italia i Portugal.
“Ketu bai”, segun Rosaria, “ta eksistí e persepshon ku Antia ta konstituí un paraiso fiskal i lo ta kompetí na un manera inhustu kontra otro paisnan ku kua e tin bon relashon. Antia a bin ta bringa fuertemente kontra e impreshon aki pa basta dia kaba. Esei mes ta un dje motibunan di kon Antia ta serando kombenio fiskal ku mas tantu pais na mundu”, di akuerdo ku Alex Rosaria.
Resientemente e parlamentario di frakshon di SP Ronald van Raak a hasi un denunsia den e direkshon aki. “Kompanianan grandi ku ta gana hopi plaka na Antia, mester realisá ku nan mester kontribuí na pais. Nan no por sigui gana tur plaka di mundu, miéntras ku situashon sosial na Antia ta motibu di hopi prekupashon”, Van Raak, bosero pa Antia di Socialistische Partij a anunsiá.
Van Raak a denunsiá loke el a kalifiká komo eksistensia di un paraiso fiskal ku ketu bai ta eksistí na Antia. “Mi a komprondé ku tin mas di 300 kompania grandi ku ta ganando hopi plaka den e pais aki, pero ku no ta dunando nada bek na pais.
E kos aki simplemente no por. No por t’asina ku e islanan ta pasando momentunan difísil anto otronan ta disfrutá di sirkunstansianan hopi faborabel”, segun Van Raak.
“Un ehèmpel konkreto segun el a menshoná, ta e kaso di eksistensia di e kompania Valero na Statia. E kompania no ta pagando kasi nada na belasting, pa kolmo e no ta empleá kasi niun siudadano di e isla tampoko den su empresa”, segun Van Raak.
Van Raak a mustra, ku e ta hasi un investigashon pa determiná si e kompanianan aki ta kontribuí den otro forma ku e parti sosial di nan komunidat, “pero mi tin miedu ku esei tampoko ta e kaso,” el a bisa.
Alex Rosaria a rechasá e ponensia di Van Raak. El a bisa ku no mester lubidá ku e konsepto paraiso fiskal ta un kos relativo. Pa Merka por ehèmpel, el a bisa, Ulanda ta un paraiso fiskal.
Dentro di poko Rosaria ta spera di manda tur informashon den un dokumento pa Komishon Oropeo pa nan por hasi e esfuerso nesesario pa konvensé e 4 paisnan menshoná pa skrap Antia for di e lista pretu di paisnan ku ta pertenesé na paraisonan fiskal.