WILLEMSTAD - Nos ta bolbe bisa: si tabatin un maneho di energia bon deliniá, awe pais Kòrsou lo ta pasando den e krísis di energia meskos ku tur otro pais, pero en todo kaso sin e difikultatnan ku e ta konfrontando awor aki, tabata e promé reakshon di sekretario di e asosashon di doñonan di pòmp di gasolin di Kòrsou COPDA, Norman Perry.
Mester bisa ku no ta promé biaha ku e asosashon ta bogando pa nos isla yega na un maneho di energia pa asina enfrentá e diferente problemanan riba tereno energétiko.
Perry a splika ku den un maneho asin’aki, ta determiná e kuadro den kua ta disidí kon ta atendé ku sierto situashonnan ku por presentá. Esei ta un forma responsabel pa hasi kos, segun el a duna di konosé.
Norman Perry a mustra ku no ta awor aki, ela bin ta splika ku tin alternativanan pa konsiderá ku por nifiká un alivio pa e oumento drástiko di preis di energia na mundu.
No ta kos nobo: nos a yega di menshoná e kosnan aki diferente biaha den pasado kaba i asta tin proposishon ku otronan tambe a yega di trese dilanti, el a bisa.
Perry a referí aki na e posibilidat pa pasa un kabel supmarino entre Venezuela i nos isla. Esei lo pèrmití nos haña energia na un preis hopi mas abou.
Un di dos posibilidat ta pa nos pais bira miembro di Petrocaribe. Segun Norman Perry, kontrali na loke hopi ta pretendé, esta ku un dil asin’aki lo hinka nos den un debe grandi, tin hopi benefisio pa Kòrsou for di un asosashon asin’aki.
Refineria Isla ta operando awor aki bou di su kapasidat máksimo.
“Ami no ke papia di preis preferensial di Venezuela. Ami ke papia mas bien di un, preis pa stabilisá merkado. Tin diferente posibilidat, pero nos ta haña un gobièrnu ku simplemente ta papiando so,” Perry a indiká.
E sekretario di COPDA a bisa ku niun hende por ninga ku e chèns ta hopi grandi ku preis di krudo ta sigui subi. Kiko gobièrnu ta bai hasi? Sigui e liña di oumentá preis di energia, ki ora ku preis di petroli subi?
Ku un maneho mas transparente, ela bisa, nos por a evitá tur e kosnan aki.
“Curoil ta bisa ta nesesario pa oumentá preis di gasolin, preis di disel, preis di tur kombustibel ku e ta bende. Pero kon nos, komo siudadano di e pais aki por kontrolá si Curoil tin rason? Unda e faktura ku tur tempu nos a boga pa mira, a keda? Ku un bon maneho di energia, nos lo tabata mihó para,” ta loke Norman Perry a deklará finalmente.