WILLEMSTAD - Parlamentu di Antia ta bai profundisá den e dianan benidero riba Enseñansa di Fundeshi. Ku e meta aki su dilanti, Staten lo reuní ku e diferente partidonan enbolbí pa asina haña un bista mas amplio posibel riba funshonamentu di e tipo di enseñansa aki. Esaki ta den kuadro di e Lei pa Enseñansa Obligatorio ku parlamentu mester trata den un reunion públiko próksimamente.
Parlamentu resientemente a trata e proposishon di lei pa eliminá siklo 3 den Enseñansa di Fundeshi. Vários miembro sinembargo a ekspresá e deseo pa tende di esnan den vèlt kon e sistema di enseñansa aki a bin ta funshoná den práktika.
Esei tabata motibu tambe pa parlamentu tuma e desishon ku ta papia ku mas tantu partner den enseñansa posibel riba e tema aki.
A invitá pa e siman aki e sindikato SITEK, Direktiva di Skolnan Katóliko i tambe Skol Humanista.
Esei lo mester sosodé den e promé dos dianan di e siman aki, esta awe djaluna i mañan djamars.
Por sierto ku parlamentu lo tin un siman di reunion kòrtiku e siman ku a kaba di kuminsá aki. Awe tardi tin un Komishon Sentral ku gerensia di UTS pa papia riba implementashon di ICT den e proseso di desmantelashon di Antia.
Mañan djamars atardi lo tin un reunion públiko den kua parlamentu lo trata e proposishon di lei pa desentralisá inspekshon laboral pa e respektivo islanan.
Di djarason pa djabièrnè awor, Staten lo ta na St. Maarten den kuadro di e konsulta bi partit ku ta tuma lugá ku parlamentu di Aruba. E enkuentro aki lo ta interesante atrobe.
Riba agènda ta figurá vários tema di aktualidat, manera funshonamentu di e Konseho Ministerial di Koperashon entre Antia i Aruba. Di akuerdo ku presidente di parlamentu antiano Pedro Atacho, esaki ta un dje kosnan ku mester evaluá. Resientemente – algun dia pasá – e Konseho a reuní aki na Kòrsou, pero despues di algun aña sin bini huntu. Pa Atacho esaki no ta e mihó forma. E ta haña ku tin hopi kos importante pa atendé i no por dura asina tantu pa e Konseho Ministerial bini huntu.
Lo papia tambe den e enkuentro ku Aruba riba e ya konosí défisit demokrátiko den Reino, riba e tratado komersial entre Reino ulandes i Repúblika di China, riba e intenshon di gobièrnu ulandes pa introdusí e lei pa deklará hóbennan antiano i arubiano komo persona no deseá, miéntras ku tambe lo papia riba futuro di POK, e enkuentro parlamentario tri partit ku tabata asina tantu den notisia último lunanan aki. Un otro punto riba agènda ta e rapòrt tokante rasismo i intoleransia di parti di Ulanda.