WILLEMSTAD/ SCHIPHOL - Martinair, ku ta ehekutando buelo tambe pa Kòrsou, a pèrdè kasi 69 mion euro aña pasá. Asina e empresa, ku ta pa 50 porshento den man di KLM a anunsiá. Aña 2006 ainda e empresa a hasi un ganashi moderá di 7 mion euro, ku tabata resultado di bon operashon di e parti di transporte di karga.
Ta atribuí e pèrdida kuantioso aki na e proseso di reorganisashon grandi ku e kompania a pasa aden.
Despues di pèrdida konstante, Martinair a disidí ku e ta stòp tur buelo dentro di Oropa. Esei a pone ku e kompania mester a kita 120 hende for di trabou, ademas bende vários avion A 320 di Airbus.
Entretantu t’asina, ku e kompania a stòp tambe tur buelo pa Asia. E empresa tabata mantené konekshon ku Sri Lanka, Oman i tambe Phuket, Tailandia. Martinair a bisa ku e ta dispuesto pa ehekutá buelo a e destinashonnan aki atrobe, solamente si e organisashon di biahe ta dispuesto pa karga tur riesgo finansiero.
Martinair a disidí ku awor e ta bai konsentrá – banda di buelonan di karga – solamente riba buelonan di pasahero pa Canada (Toronto, Vancouver) i region di Karibe, entre kua Kòrsou, Aruba, Cuba, Repúblika Dominikano, Costa Rica i Sürnam. Banda di esei, e lo sigui ku su buelonan diario pa Miami.
Pa loke ta e último aki, Martinair a sera kombenio ku American Airlines pa buelonan di kontinuashon. Pero den e region aki tambe a skrap algun buelo, entre nan Jamaica, Edmonton i Orlando.
E kompania por sierto mester a invertí tambe den su flota, pa kambia e avionnan jumbo di karga, pa e tipo Boeing 747-400 ku ta mas ekonómiko i ta hasi ménos bochincha.
E intenshon ta pa Martinair kambia tambe su avionnan pa buelonan ku Boeing 767 ku ta mas tantu buelonan riba distansia largu.
Martinair a disidí di bende tambe práktikamente tur su kompanianan supsidiario. E empresa ta konsiderando tambe pa stòp di hasi sierto aktividatnan ku no ta pertenesé na su aktividatnan primario. Kua esakinan ta, awor aki ta den proseso di estudio.
Martinair tabatin parti den Tampa Cargo, un empresa na Colombia enkargá ku transporte di karga, pero entretantu a pasa su akshonnan pa su partner di negoshi Avianca. Martinair a sera despues un akuerdo di koperashon ku e mesun kompania aki.
Doñonan di Martinair KLM i tambe e kompania Maersk ketu bai ta tratando di kumpra e kompania aki kompletamente. Pero Komishon Oropeo te ku awor ta ninga di duna pèrmit pa esaki sosodé.