3er Curaçao Dive Festival atrobe lo deleitá sambuyadónan

WILLEMSTAD - Pa di tres biaha kaba Curaçao Tourist Board (CTB) ta organisá Curaçao Dive Festival. E festival di 2008 ta tuma lugá di 24 pa 31 di mei. E aña aki atrobe e festival ta primintí di bira un goso profundo pa sambuyadónan tantu internashonal komo lokal. E echo ku Kòrsou resientemente a haña un nominashon spesial di Scuba Diving Readers Choice Award komo e sitio di buseo di mas salú na mundu, a kontribuí na subi e interes mas tantu ainda.
Esaki ta netamente pasobra Kòrsou tin tur e karakterístikanan di un paraiso di buseo, manera poko tin na mundu. E nominashon spesial di Scuba Diving pa e ambiente bou di awa di mas puru i e skor di Kòrsou komo un di e mihó islanan den Karibe pa snòrkel kantu di kosta, ta wòrdu usá ku orguyo dor di CTB den su promoshon internashonal. Sambuyadónan di rònt mundu ta apresia Kòrsou, entre otro pa e 60 sitionan di sambuyá registrá, ku 57 sorto di koral, 500 sorto di piská i mas ku 20 operadornan di buseo riba nos isla.
E Curaçao Dive Festival ku ta wòrdu organisá komo konsekuensia di esaki, ta ofresé un siman di goso intenso di Kòrsou su mundu bou di awa na fanátikonan di buseo i otro interesadonan. E programa ta varia tur dia di trepnan di buseo eksótiko den dia i anochi tantu na e parti pariba, pabou i meimei di e isla. Tambe tin tayérnan interesante organisá pa ekspertonan den e mundu di buseo, sine riba bich i happy hour kaminda partisipantenan por topa den en ambiente ameno. Tambe e festival lo haña publisidat internashonal di Scuba Dive Magazine, Dive Photo Guide, Dive Chronicles, The Robertson Treatment, Men’s Journal, Plenty en Maxim.
Tur esaki a bira posibel dor di aporte di Atlantis Diving & Appartments, All West Curaçao, CHATA, Chogogo Resort Curaçao, Explore Curaçao, Fiesta Tours, Habitat, Hilton Curaçao, Kura Hulanda Lodge, Lions Dive Beach Resort, Livingstone Jan Thiel Resort, Ocean Encounters Curaçao, Sunset Waters i Superclubs Breezes. E operadónan di buseo ku ta asosiá ku CHATA Dive Task Force, tambe ta duna nan kolaborashon den asuntunan organisatorio i logístiko di e festival.
E tayernan durante e festival ta na enkargo di e ekspertonan mas renombrá den buseo internashonal ku tópikonan manera ‘divers first aid tips’, ‘fotografia bou di awa’ i informashon di medio ambiente. Amantenan di buseo lokal i otro interesadonan tambe por partisipá na tur e aktividatnan aki pa un preis rasonabel di Naf. 25. Pa inskribí mester tuma kontakto ku CTB, ku ta orguyoso promotor di Kòrsou komo e paraiso di buseo i destinashon duradero di fakansi.