Lo firma akuerdo e siman aki durante bishita Bijleveld

WILLEMSTAD – Tantu Gobièrnu di Antia komo di Kòrsou a ekspresá alegria i satisfakshon ku Gobièrnu di Reino a bai di akuerdo ku e Insiativa Sosial-Ekonómiko (SEI). Meimei di e turbulensia ku Kòrsou tabata pasando aden, Konseho di Minister di Reino a duna su aprobashon na e proyekto aki djabièrnè último.
E siman aki mes lo tin firmamentu di e dokumentunan ku ta korespondé ku e Insiativa Sosial-Ekonómiko (SEI) ku ta derivá for di e Slotverklaring ku a firma na novèmber 2006. Esei lo tuma lugá durante e bishita di Sekretario di Estado Ank Bijleveld (Asuntunan Interior i Relashonnan den Reino) ku lo hasi un bishita di trabou for di 20 te ku 23 di mei.
E Representashon di Ulanda na Antia a informá, ku e motibu di e bishita ta konsultá polítiko tokante e reforma polítiko den Reino. E programa ta enserá tambe firmamentu di e Inisiativa Sosial Ekonómiko (SEI) pa Kòrsou. E Sekretario di Estado lo hiba konsulta polítiko ku Kòrsou, St. Maarten i pais Antia tokante progreso di e reformanan estatal. Durante e konsulta gubernamental ku a pasa, a sali na kla, ku no ta sigur ku tur kos lo ta kla pa final di 2008. E ora ei a palabrá pa traha un planifikashon nobo i realístiko. Otro puntonan importante riba agènda ta supervishon finansiero pa St. Maarten i Kòrsou i interpretashon mas aleu di e palabrashonnan tokante e futuro Ministerio Públiko.
Pa medio di e Inisiativa Sosial Ekonómiko Ulanda lo invertí den fortifikashon di e struktura sosio ekonómiko di Kòrsou, pa asina krea un base fuerte pa e futuro status di pais independiente den Reino. Ku esaki e € 60.5 mion ku Ulanda a akordá ku Kòrsou pa e SEI, ta bira disponibel. Pa suplementá e montante aki Kòrsou tambe ta pone fondo disponibel pa e Inisiativa Sosial Ekonómiko.
Tantu gezaghèber Lisa Dindial komo diputado di Struktura Estatal Zita Jesus-Leito a ekspresá satisfakshon pa e desishon. “Ta un bon notisia”, asina diputado Jesus-Leito a bisa. SEI tin komo meta pa durante di e periodo 2008-2010 implementá diferente proyekto, reforma i medida ku por kondusí na mehorashonnan struktural di struktura ekonómiko i por kontra-arestá retrasonan sosial den komunidat di Kòrsou. SEI lo dediká atenshon tambe na diferente reforma atministrativo ku ta nesesario pa garantisá kalidat i kontinudat di gobernashon. Tambe tin den dje inisativanan pa mehorá funshonamentu di merkado laboral.