Wak pa abo no keda tras
Komo imigrante digital mi sa ku mi a skapa dor di adaptá mi mes na e oportunidatnan pa kambia mi manera di pensa i funshoná den un mundu digital. Hopi hende di mi generashon ainda tin problema pa adaptá na pensamentu i funshonamentu digital. Pero bida digital ta un realidat ku no por evitá. Si bo ke funshoná profeshonalmente bo no por riska na konsiderá pa legumai desaroyo digital. E desaroyo a pone e.o. ku mayornan ku tin yu afó por spar plaka di yamada di telefòn, pasobra konstantemente tur dia i na tur momentu bo por komuniká barata ku e yu afó hasiendo uso di teknologia moderno digital. Tempu ami a bai studia hopi hopi aña pasá, mi mama mester a manda karta pa palabrá ku dos siman despues riba djadumingu lo mi ta den mi kamber pa e por bèl mi. Anto e mester a paga masha hopi sèn pa minüt pa un kombersashon telefóniko kòrtiku. Awe tur mayor den mundu digital, ta yama yu na kualke parti di mundu, tur dia mòru i bonochi, pa un preis relativamente barata.

Ya ta dos siman pasá ku mi a partisipá na e konferensha riba maneho di informashon ku a tuma lugá aki na Kòrsou. Un evento sumamente importante pa hendenan ku ke salbaguardiá informashon ku tin disponibel ainda awe. E tabata un oportunidat pa a haña sa kon archivonan ta benefisiá di e desaroyo digital.
Tabata bon pa sa ku ni na Ulanda nan no ta asina leu pa bati man riba pechu i deklará ku nan maneho di informashon ta bai ku tempu.
Sam sam ku tur desaroyo estatal ku tin awendia mester tin e komprondementu i noshon pa e desaroyo urgente i nesesario ku ta esun di maneho di informashon. Pasobra kiko nos ta bai hasi den un Pais Kòrsou sin dokumentonan ordená? Sin ku por bai bèk, 1, 5, 10 te shenti piku aña pa por kontinuá? Sin por tin material pa komprobá nos historia? Awor aki kaba tin informashon ku ta difísil pa haña. Sea a dispidí nan òf no sa na unda nan ta wardá eksaktamente. Si nan tabata digitalisá lo por tabata mas fásil pa a konserva nan.
Un futuro Pais Kòrsou sin konosementu di kiko nos tabatin, ta algu hopi tristu i un posibilidat ku nos ni mester konsiderá. Pero esei ta un otro historia.

Loke mi ke bin riba dje ta e urgensia pa tur hende muda pa mundu digital. Kambia manera di pensa i riska na wak ta kiko e ko’i ta. Den kombersashon ku vários hende ku ke men ku nan karera di trabou ta kabando i ku ta penshun nan ta sinta warda, mi ta tende ku nan no ta mira motibu pakiko nan mester dominá kòmpiuter i Internèt. Segun e hendenan aki, den mayoria empleado, tòg nan lo no tin mester di kòmpiuter i Internèt mas, pasobra nan ta bai stòp di traha. Ku rèspèt pa esun ku ta pensa asina mi ta riska na bisa ku e pensamentu ei ta forma un trampa pa e persona ku ta kere ku despues di penshun e ta kla ku teknologia moderno. Si bo no a prepará bon pa bo penshun espesialmente pa e relashonnan humano ku bo mester tin, anto abo ta esun ku lo benefisiá di teknologia moderno pa librabu di isolashon i soledat.
Sigur pasobra na momentu ku bo ta ku penshun i ku bo tin hopi tempu liber tin otro hende ta traha òf tin otro hende ku no tin ten pa bo pa kualke rason.
Ki mas por tin si bo por usa bo kòmpiuter i komuniká ku amistatnan, yunan i ñetunan rònt mundu i te asta esnan na Kòrsou mes ku bo no ta mira pasobra nan no tin ten? Pero nan por kontestá un e-mail ku bo a manda si i esei por ta rason pa nan pasa wak bo.

Mi ta kontentu ku ami a muda pa mundu digital.

Bon siman i chek mi blòg na www.notabel.com.