MERKA, - E aspirante demókrata pa Presidensia di Merka, Barack Obama, ayera a bisa den entrevista na televishon ku e republikanonan mester laga su esposa Michelle Obama na pas, i konsentrá nan krítikanan riba é i riba su polítika.
“Si nan ta kere ku nan ta bai trata hasi Michelle un asuntu den e kampaña aki, nan mester tene kuidou, pasobra esaki ta inaseptabel”, e senador pa Illinois a bisa den deklarashonnan na programa “Good Morning America” di kadena di televishon nashonal ABC.
“Laga mi esposa na pas!”, Obama a señalá den mensahe direkto na su opositornan despues ku Partido Republikano di Tennessee a emití un video di kuater minüt riba “site” di Internet di YouTube, reprodusiendo komentarionan kontroversial di Michelle Obama.
A kritiká Michelle komo antipatriota pa a komentá na febrüari último: “Pa promé bia den mi bida adulto, mi ta sinti mi orguyoso di mi pais”.
Señora Obama a deklará despues ku el a referí n’e sentido síviko ku a keda spièrtá, ku kampaña demókrata ta logrando motivá.
Den su komentarionan ayera, Obama a bisa ku “Michelle ta e persona mas honesto, e mihó persona ku ami konosé. E stima e pais aki. I esnan ku ta trata hunga ku pida di su komentarionan p’e keda mal mirá, mi ta kere ku esaki ta di klase abou”.
Michelle a kompañá su esposo durante e entrevista ku ABC, i a bisa ku e merikanonan ta kla pa interesá nan mes den asuntunan i no den kosnan “ku no tin nada di aber ku mehorá bida di personanan”.
E entrevista ku ABC a tuma lugá 24 ora promé ku e elekshonnan primario di awe na Oregon i Kentucky.