WILLEMSTAD - Den seno di bida familiar mester bai adaptá i tuma medida pa kontrarestá e subimentu di preis, i tambe e kosto di bida ku ta birando mas karu pa tur hende. Asina Mirtha Leetz-Cijntje, presidente di Fundashon Sentro di Dama, a splika. E mama i tata, ta esnan ku ta kontrolá e finansa di kas, señora Mirtha Leetz-Cijntje a splika, relashoná ku selebrashon internashonal di Dia di Famia.
E presidente di SEDA a splika, ku e selebrashon a bai hopi bon. E komunidat di práktika i kliente i tambe gruponan di dama a asistí na gran kantidat riba e plenchi di SEDA, miéntras ku e programa tabata hopi variá. E tema di e dia tabata ‘Molda progreso’. Ta e mesun tema na kua a dediká atenshon na dje, dia 8 di mart último, riba Dia Internashonal di hende muhé. Ta trata di un tema, ku universalmente, durante dje tres añanan benidero ta wòrdu usá pa evaluá progresonan ku ta tuma lugá riba sierto área di bida familiar. SEDA tin un aña kaba ku ta trahando riba e parti di entrada pa stimulá konsientisashon di tur e problemanan familiar ku tin den nos komunidat.
Tambe SEDA ta dediká atenshon na tur loke ku nos tin, den kultura pa loke ta trata e bida familiar, segun señora Leetz-Cijntje.
Durante dje selebrashon siman pasá, SEDA a konsentrá riba dos asuntu hopi importante. Na promé lugá a klousurá e kurso titulá ‘Tan ken mi ta’, ku shete sertifikado di mayornan hóben ku a forma parti di un grupo di 20 hende ku a inskribí. Tambe tabatin un di dos grupo di dies kursista, ku a logra ochenta porshento di asistensia. Na un manera artístiko, e grupo aki a trese dilanti, kiko tabata e partinan di mas importante di kresementu den e ocho simannan di sinku ora di lès, durante kua a dediká atenshon riba partinan di nan kurpa, mente, e parti spiritual i tambe e parti emoshonal.
Den e di dos parti di e programa, señora Brewster den representashon di minister di Hustisia a risibí e ‘Kuadro di maneho’, ku SEDA a finalisá.
Na nòmber di e komishon ku a traha riba e asina yamá ‘Lei di famia’ a entregá e kuadro na señora Brewster, ku na su turno ta entreg’é na minister di Hustisia.