WILLEMSTAD - Pa medio di un diálogo, ku mester tuma lugá entre di eks i aktual miembronan i direktiva di Horecaf, mester evitá ku e aktua sede di e sindikato ta wòrdu bendé. Eks sekretario general di Horecaf, Oscar Semerel ta hopi preokupá pa benta di e edifisio ta situá riba un bon lokalidat na Seru di Otrobanda, dilanti di e anterior Sint Thomas College. ‘E edifisio ta fásilmente alkansabel i por wòrdu bon eksplotá, den kaso ku e wòrdu drechá’, ta opinion di Semerel. Tur hende por alkansá e edifisio fásilmente.
Ademas e edifisio, ku for di aña 1977, ta sede di Horecaf, ta riba tereno propio i ta un edifisio monumental. Semerel a sigui splika, ku no ta un edifisio na kua sin mas por hasi kambionan.
Benta di e sede di Horecaf, segun e eks sekretario general di e sindikato, nunka lo no por produsí e suma ku realmente e ta bal.
Den kaso ku ta un problema tin, mester purba yega na un otro solushon, ménos esun di bende. Esaki pasobra ku tin hopi posibilidat ku e edifisio.
Segun Semerel, e ta na altura ku tin hende den seno di gerensia di hotèlnan, ku tambe ta kontra di benta di e hotèl.
Oscar Semerel entretantu a partisipá na sekretario general di Horecaf, Kenneth Valpoort, su deseo pa konhuntamente ku e interesadonan pa den forma di un diálogo, buska un solushon pa evitá benta di e edifisio. ‘Tin un otro solushon, den forma un plan maestro eksistente, ku mester a produsí sufisiente fondo pa evitá ku e organisashon ta karga ku demasiado gastu.
Semerel a splika, ku a trata di e proyekto, pa drecha e parti dilanti di e edifisio i muda e ofisinanan di Horecaf, pa e parti patras.
E parti ku ta keda habrí por wòrdu di hür i generá entrada pa e sindikato.
NO TIN MESTER!
Sin kier a bai muchu den detaye riba e deklarashon di Oscar Semerel, Humphrey Mongen, di direktiva di Horecaf, a splika ku ta pa mas ku dies aña, e sindikato ta purba na bende e edifisio. ‘Aktualmente nos ta den e fase final’, asina Mongen a splika.
Segun Humphrey Mongen, e benta dje edifisio ku te ainda ta sede di Horecaf ta nesesario, pasobra e sindikato no tin mester di un edifisio asina. ‘Direktiva di Horecaf ta buskando un edifisio ku ta mas apropiá’, Mongen a enfatisá.