WILLEMSTAD – 300 Trahadó mas por haña trabou na Renaissance Hotel i esnan ku ta interesá por akudí djasabra awor na e asina yamá ‘’Job Fair’ di e hotèl. E Feria di trabou ta kuminsá 10or di mainta i ta dura te ku 6or di atardi. Esaki ta lokual, Angelo Martes, gerente di e departamentu di e Departamentu di Rekurso Humano di Renaissance Hotel a konfirmá den entrevista ku LA PRENSA.
Segun Martes, e intenshon ta pa duna oportunidat na pueblo di Kòrsou i tur hende ku ta interesá den hospitalidat, pa forma parti di e organisashon. Djasabra e interesadonan personalmente por risibí informashon i na mesun momentu por apliká pa e trabou ku nan ta deseá. Angelo Martes a sigui splika, ku durante e Feria di trabou, lo ta posibel pa solisitá pa tur posishon. ‘Riba nos website, www.renaissancecuracao.com, tin publiká tur e puestonan ku tin habrí i tur hende ta liber pa solisitá riba e vakaturanan’.
Refiriendo na e kantidat di personal ku Renaissance tin mester, Martes a bisa ku e hotèl ta den e proseso pa gradualmente yena e organisashon. Riba e kantidat di hende ku Renaissance tin kaba den servisio, e hotèl tin mester di 300 hende. Di e kantidat aki, tin mester di 100 hende pa traha den kasino.
E sobrá 200 empleadonan lo wòrdu empleá den e hotèl.
Kontestando e pregunta, pa kua tempu, e aplikantenan lo por wòrdu tumá den servisio, señor Martes a bisa ku esei ta basá riba e planifikashon aktual di e hotèl, ku Renaissance lo habri na òktober awor. Saliendo for di e punto di bista di e planifikashon ei, e selekshon pa e parti mas grandi di e vakaturanan, ta tuma lugá na yüni awor. Ta trata di prinsipalmente e posishonnan pa den kasino ku mester wòrdu yená. E hendenan ku ta bai traha den e sektor aki, lo mester sigui un kurso di un durashon di por lo ménos tres luna. Despues gradualmente, Renaissance lo kontinuá ku e proseso di tuma hende servisio, te ku luna di sèptèmber.
E Departamentu di Rekurso Humano, ta konvensí ku lo e haña tur e trahadónan ku ta nesesario, riba e merkado lokal.’’Nos meta ta, pa haña riba e merkado lokal e hendenan ku nos tin mester’’, Angelo Martes a bisa LA PRENSA.
Konsientemente Renaissance a duna e Feria di Trabou djasabra awor, tin un toke familiar. ‘’Nos sa ku djasabra ta un dia di famia i ta p’esei den e programa a tene kuenta ku entretenimentu pa mucha’. Esei, segun e splikashon di Angelo Martes.