WILLEMSTAD – “United Telecommunication Services UTS, meskos ku esei tabata e kaso den 2006 a hasi un ganashi den 2007. Si den 2006 e ganashi tabata alrededor di 25 mion florin, den 2007 e montante ainda no ta konosí ofisialmente pasobra e kompania mester kaba ku su kuenta anual, ku ta kuestion di algun siman mas”, asina direktor di e kompania Paul de Geus a konfirmá den Staten ayera.
UTS tabata wéspet di parlamentu antiano ayera pa diskutí situashon aktual di UTS i futuro implementashon di ICT den e kompania, tambe ku mira riba desaroyonan estatal ku ta na kaminda.
Miembronan di Staten a hasi bon uso di e okashon pa hasi preguntanan krítiko na gerensia di UTS ku tabata presente.
E anunsio di ganashi di parti di UTS no a bin sin mas: durante e enkuentro ayera tabatin miembro di parlamentu ku a puntra si ta intenshon pa “UTS sigui hasi ganashi di e forma aki riba lomba di pueblo”.
UTS, segun su direktor ta operando den un merkado kompetitivo. Nos no ta den un merkado monopolista. Den e merkado aki gobièrnu a stipulá regla ku nos por subi riba sierto nivel, anto UTS ta tene kuenta ku esaki, segun De Geus, referiendo na e pregunta di parlamentu kiko ta e ganashi maksimal ku ta pèrmití pa UTS hasi.
Paul de Geus a splika, ku pa kuminsá ta bon pa splika, ku e ganashi di 2006 no ta un ganashi sin mas: aki por papia mas bien di un ganashi fiskal, el a bisa.
El a splika ku UTS, for di su promé aña di eksistensia a konosé pèrdida kuantioso. Na 2003 UTS a hasi un pèrdida di 4 mion florin. Na 2004 UTS tabatin 33 mion na pèrdida, miéntras ku na 2005 tabatin un pèrdida di 54 mion florin.
Ta vários aña tras di otro tabatin pèrdida grandi. E ganashi di 25 mion den 2006 no ta ganashi basá riba operashon. Ta ganashi ku mas bien por kalifiká komo ganashi fiskal. Komo ku UTS tabatin pèrdida grandi tras di otro tabatin algun biaha ku no mester a paga belasting, ku por ser kalifiká pues komo un ganashi fiskal, segun De Geus.
E ganashi fiskal aki tabata un 16 mion. E ganashi riba operashon mes tabata un 2 mion miéntras ku pa loke ta e operashon na St Kitts, tabatin un 6 mion ku mester a ser repartí entre e dos partnernan Kòrsou i St. Kitts. A base di e kalkulashon aki, a yega na e ganashi di 25 mion florin, e direktor a splika.
P’esei mes, el a enfatisá ku no ta korekto papia di ganashi grandi riba lomba di pueblo.