WILLEMSTAD – “Kompania di telekomunikashon UTS tin mester di un 400 mion pa modernisá su infrastruktura aki na Kòrsou. UTS ta awor aki den un merkado hopi kompetitivo i komo tal no tin otro eskoho sino di sigui kompetí riba e nivel di duna e mihó servisio posibel”, asina direktor di UTS Paul de Geus a informá parlamentu ayera durante un reunion di Komishon Sentral.
Gerensia di UTS a duna un splikashon ekstenso riba su funshonamentu.
Awor aki UTS mester bai pone un infrastruktura kaminda mester yega na kada kas ku kabel di fibra óptiko.
“Kòrsou tin un 50 mil kas. E invershon ku UTS a kalkulá ku e mester bai hasi ta alrededor di 400 mion florin. No mester lubidá ku kada kas ku mester bai awor aki lo kosta UTS 9 mil florin”, asina De Geus a informá.
“Telekomunikashon”, segun De Geus, “semper a sòru pa un bon desaroyo ekonómiko di kada pais. Un pais ku no a konosé e desaroyo ei, no a konosé tampoko un desaroyo sosial ekonómiko balansa” el a splika.
Tin un relashon direkto, segun International Telecommunication Union entre e nivel di desaroyo di telekomunikashon den un pais, ku e desaroyo sosial ekonómiko dje pais ei.
Esei mes ta pone e responsabilidat riba lomba di UTS pa sòru pa un nivel di desaroyo teknológiko haltu. UTS no ke kai atras, pasobra esei lo nifiká ku desaroyo di pais tambe ta bai atras i ounke UTS no por kompetí ku e forma ku paisnan grandi ta avansando den nan teknologia, nos mester sòru pa nos no keda muchu atras tampoko, segun De Geus.
Ta p’esei den e siman ku a pasa UTS a introdusí su servisio UMTS, ku ta e di tres generashon di servisio di telefon mobil. Paisnan desaroyá manera Oropa i Merka ya konosé e sistema aki kaba.
Esaki ta trese kuné mesora, ku mester invertí den infrastruktura i den rekurso humano.
“Na momentu ku bo tin hende ku ta komprondé teknologia i por kana pareu ku esaki, UTS por mantené un bon desaroyo,” el a bisa.
UTS su filosofia ta ku e servisio ku e ta duna, mester ta na un preis pagabel. Pero den e preis pagabel aki, mester tene kuenta tambe ku e gastu di invershon ku e kompania mester hasi pa sigui garantisá un bon servisio i e invershon aki mester sali for di loke UTS ta kobra na tarifa, el a bisa.
Awor aki tin algun desaroyo ku mester tene kuenta kuné.
Ántes, e sentralnan di telefon tabata un kos mekániko. Esaki a kambia i bira un sentral digital i awor aki ta hasiendo kambionan pa e bira e sistema IP ku ta ser manehá pa un kòmpiuter.
Un otro desaroyo ta e hecho ku kabelnan di koper awor a bira kabel di fibra ku tin mas kapasidat. UTS awor aki ta movementu pa e siguiente generashon. Esaki ta nifiká, ku mester hasi un kambio hopi grandi. E infrastruktura mester kambia fundamentalmente, di tal manera ku e kompania por keda kompetitivo ku e empresanan ku tambe ta den e mesun merkado.
“E infrastruktura nobo tin komo bentaha ku e tin un gastu hopi mas abou. Pero pa e kambio mes, mester hasi un invershon hopi grandi”, segun De Geus a splika. “UTS ta pasando den un proseso di transformashon kompleto”, el a agregá.