WILLEMSTAD - Ku eliminashon di siklo 3 di Enseñansa di Fundeshi, de fakto a eliminá Enseñansa di Fundeshi. Loke de fakto tin awor aki ta e skol básiko manera nos a konosé semper, den un estilo nobo.
Na palabra presidente di SITEK Sidney “Bicho” Justiana, kende ayera tardi tabata invitado di parlamentu di Antia.
Tal manera nos a informá for di ayera, parlamentu di Antia e siman aki lo profundisá riba Enseñansa di Fundeshi. Staten lo reuní ku e diferente partidonan enbolbí pa asina haña un bista mas amplio posibel riba funshonamentu di e tipo di enseñansa aki. Esaki ta den kuadro di e Lei pa Enseñansa Obligatorio ku parlamentu mester trata den un reunion públiko próksimamente.
Parlamentu resientemente a trata e proposishon di lei pa eliminá siklo 3 den Enseñansa di Fundeshi. Vários miembro sinembargo a ekspresá e deseo pa tende di esnan den vèlt kon e sistema di enseñansa aki a bin ta funshoná den práktika.
Esei tabata motibu tambe pa parlamentu tuma e desishon ku ta papia ku mas tantu partner den enseñansa posibel riba e tema aki.
Ayera tabata turno di e sindikato SITEK pa duna su punto di bista riba esaki.
Presidente di SITEK a kuminsá na remarká den su disertashon, ku e ta desilushoná pa e forma ku parlamentu ta duna “follow up” riba reunionnan ku tene riba enseñansa.
“Algun luna pasá nos tabatin por ehèmpel un reunion hopi importante riba enseñansa, pero nos no ta weta nada ku ta sosodé ku e konklushon i resultado di e reunion. Mi ke pidi atenshon pa esaki”, segun Justiana.
E presidente di SITEK a mustra ku no por tin diskushon ku Enseñansa di Fundeshi mester sigui. Hecho ta, ku si implement’é manera mester ta, e ta trese desaroyo. Pero den práktika nos a weta ku e forma ku a implementá e sistema a krea mas bien un brecha i a produsí kosnan ku ta kontra nos sistema di enseñansa.
Enseñansa di Fundeshi ta sali for di punto di bista ku e idioma di instrukshon ta fundamental den enseñansa. No ta pòrnada, a disidí ku ta papiamentu ta bira e idioma di instrukshon na skol.
Anto hustamente esaki a bira e problema: nos ta haña hopi kuestionabel ku awor ke kambia e idioma di instrukshon.
“Nos ta huzga un hóben kon bon e ta dominá ulandes. No ku ulandes ta malu, pero e punto ta ku nos ta papiando aki di un idioma ku ta muriendo. Di akuerdo ku análisis di UNESCO, den futuro ta dos idioma lo tin chèns di sobreviví, ku ta ingles i spañó,” di akuerdo ku Justiana.
Justiana a remarká tambe ku si weta e pruebanan kordiná ku skolnan a traha siman pasá, e ta motibu di hopi preokupashon. Ora weta e teksto, e ta hopi difísil.
“Ni na Ulanda”, el a bisa, “no ta bin ku e tipo di tekstonan aki. Dentro di poko”, segun Justiana, “SITEK lo manda un análisis ku el a hasi di e pruebanan aki pa parlamentu”.
Na momentu ku aprobá e lei riba Enseñansa di Fundeshi ku artíkulo 10, ta eliminá outoridat di teritorionan insular.
“Loke nos ta hasi de fakto, ta kue un outoridat ku ta den man di teritorio insular i pone esaki den man di 9 fundashon ku ta e direktivanan di skol ku ta rigi enseñansa riba nos isla. Nuebe fundashon ku gobièrnu no tin nada di bisa. Ta nan mes ta skohe nan presidente. Ta korekto saka outoridat di teritorio insular i hink’é den man di direktiva di skol? Anto den tur esaki, ta gobièrnu ta esun si, ku mester paga,” e presidente di SITEK a puntra.
Na 1999 a tuma e desishon ku mester tene kuenta ku deseo di mayor ora ta skohe idioma di instrukshon. Pero awor aki nos a disidí ku ta saka mayor afó, pone direktiva di skol ku ta outónomo.
E presidente dje sindikato di enseñansa a referí ademas na e hecho ku un direktiva di skol ta kita hende, e hende ta biba e direktiva korte, e hende ta gana anto e direktiva mester paga. “Pero laga nos ta honesto: ta gobièrnu ta paga”, segun Sidney Justiana a indiká.
Sidney Justiana tabatin finalmente e petishon na parlamentu pa laga evaluá enseñansa i pa evaluá tambe e proseso di rekapasitashon. Evaluá e asuntu di sèn i invershon den enseñansa. Kisas ta bon pa konsiderá tambe pa organisá un kumbre di enseñansa, el a agregá.
E dirigente sindikal a hasi un apelashon riba parlamentu pa nos laga su entusiasmo pa pasa lei, pasa e lei aki ku tin konsekuensia funesto pa nos enseñansa.