PARAMARIBO / WILLEMSTAD - E kòntròl 100 porshentu na aeropuerto Schiphol mester keda, pero ta nesesario si, pa e trato bira mas humano. Esei ta loke promé minister di Ulanda Jan Peter Balkenende a konkluí, despues di su bishita na e eks kolonia di Ulanda Sürnam.
Jan Peter Balkenende, huntu ku su kolega enkargá ku Asuntunan Eksterior Maxime Verhagen a bishitá Sürnam den e dianan ku a pasa. Nan a asistí na e kumbre na Latinoamerika ku mester a atendé entre otro ku e problema di pobresa na mundu.
Tabata konosí for di kuminsamentu, ku e tema di kòntròl 100 porshento na Schiphol lo a bira un tema importante durante e deliberashonnan entre e dos ministernan ulandes i gobièrnu di Sürnam.
Pa bastante tempu kaba Sürnam a bin ta kritiká e forma ku outoridatnan na Schiphol ta trata siudadanonan di Sürnam ora nan yega Ulanda. Ta komo sifuera ta asumí sin mas, ku tur Sürnam ku yega Ulanda ta bolitero òf tin droga na nan kurpa.
E kos aki ta un ofensa pa nos, anto nos ke pa e kos aki para mas lihé posibel, gobièrnu di Sürnam a reiterá na diferente okashon. Presidente dje pais Ronald Venetiaan den pasado a yega di skibi karta ofisial na gobièrnu ulandes pa hala atenshon di Ulanda ku dje forma aki simplemente no por sigui. Pero, ta parse ku no tin oido pa e problema.
E situashon ta un problema komo ku outoridatnan – no opstante presensia di un bòdiskèn – ta sigui trata e yu di Sürnam komo un kriminal i ta listra su kurpa na un manera ku no ta desente.
Na masha hopi okashon tabatin protesta kontra esaki, inkluso di gruponan surinameño establesé na Ulanda mes.
Durante e deliberashonnan resien na Sürnam, a papia riba e asuntu aki. Promé minister Jan Peter Balkenende, durante un enkuentro ku prensa a primintí ku lo duna e kòntròl aki un karakter mas humano. El a atmití ku tin espasio pa drecha e situashon aki. E intenshon ta pa sigui monitor e situashon. Mester bisa ku ya kaba tin komishonnan miksto ku ta reuní dos biaha pa aña pa papia riba e kòntròl aki.
Minister di Hustisia i Polis di Sürnam Chandrikapersad Santokhi a bisa, ku lo evaluá e palabrashon aki tambe i si mester bin kambio lo anunsiá esei mas despues.
Santokhi a bisa, ku su kolega ulandes Ernst Hirsch Ballin ta bishitá Sürnam na ougùstùs awor durante kua lo deliberá riba tur kos ku ta pendiente.