BEVERLY HILLS, CALIF., - Mike Piazza a disidí di retirá despues di 16 temporada den Liga Grandi, kaminda e tabata un di e mihó kèchernan batidó den historia di beisbòl.
“Despues di a diskutí e opshonnan ku mi kasá, famia i agente, mi a sinti ku a yega tempu pa un otro kapítulo den mi bida”, asina el a bisa den un komunikado ayera ku a keda emití dor di su agente Dan Lozano. “Tabata un gran karera i awe mi ta bai sin lástima”.
“Mi sa ku e dia aki tabata pa bini i durante di e último dos añanan mi a kuminsá prepará mi mes. Mi a duna tur kos ku mi tabatin i laga tur kos riba tereno”.
Piazza di 39 aña tabatin promedio di .279 ku 8 honron i 44 kareda empuhá temporada pasá ku Oakland Athletics komo batidó designá. El a bira agente liber i no a bolbe firma.
E no tabata disponibel pa diskutí su desishon di akuerdo ku Josh Goldberg ku ta e bosero di Lozano.
Los Angeles Dodgers a firm’é for di e draft di 1988 den e di 62 buèlta.
Piazza a hunga den 12 All-Star Team di kual 10 konsekutivo kuminsando for di 1993.
“E tabata un di e batidónan ku por a kambia un wega ku un swing. Sigur ku e tabata un di e kèchernan ku tabata bati mas mihó di nos tempu i por ta di tur tempu”, asina Tom Glavine, ku tabata kompañero den Mets huntu ku Piazza, a bisa.
Piazza a tèrminá su karera ku promedio di .308, ku 427 honron i 1335 kareda empuhá, hungando pa Dodgers di 1992-98, ku Marlins na 1998, ku Mets di 1998-2005, ku San Diego na 2006 i Oakland na 2007.
“Esaki ta final di un karera di un miembro di Salon di Fama”, asina mènedjer di Mets Willie Randolph a bisa. “Tabata un privilegio di por a dirigí Piazza pa un tempu kòrtiku.
Piazza su 396 honronnan ta e mayor kantidat pa un kècher di akuerdo ku The Elias Sports Bureau. Carlton Fisk ta di dos ku 351, siguí pa Johnny Bench ku 327 i Yogi Berra 306.
Piazza a gradisí su famia, timnan, mènèdjernan i algun di su kompañeronan i hasta doñonan di ekipo, gerentenan general i stafnan di Liga Menor i reporteronan.