Skina di Sorti, awe djarason 21 di mei di 2008, ta kuminsá ku deseá tur hende un bon dia. Den e kolumna aki, tur pero tur partido ku a duna motibu pa opservashon kritiko tabata opheto di kolumnanan skèrpi i na okashon te hasta mi a hasi denunsia di akshonamentu kontra di integridat personal i òf profeshonal. PAR, PNP, MAN, FOL, FK, PS, DP i algun miembro di nan den forma individual a keda adresá den kurso di tempu. Algun a skohe pa saka benefisio for di nos opservashonnan, miéntras otro a kai den e trampa di ninga bèrdat i algun te hasta a opta pa ataká e mensahero.
****
For di promé ku a forma e aktual Bestuurscollege mi a atvertí pa e konsekuensia di un aliansa pa un solo ophetivo di parti di PAR i PNP (pasa e “slotverklaring”) ku riba término lo a afektá interes general mas ku e “slotverklaring” su presunto benefishinan. Un di miembro di PAR ku mi a topa algun tempu pasá, a aseptá ku mi atvertensia tabata na su lugá i ku tempu a duna mi rason.
****
Mi a atvertí ku un koalishon di apénas 11 miembro (probá komo un riesgo polítiko grandi), no ta motibu pa kere ku nos lo bai haña mas stabilidat den gobernashon di Kòrsou. Pero miembronan di e koalishon a deklará nan konvikshon ku e koalishon lo ta esun ku lo bai sinta despues di e próksimo elekshon, komo e promé koalishon di mayoria pa sostené e promé gabinete di Kòrsou. Si esaki, esta kumpli ku lokual a keda deklará, ta un ophetivo di PAR i PNP, ta bira sumamente difísil pa nan ehersé influensia riba e renchi di mas suak den e kadena, pa lokual ta aplikashon di reglanan di bon gobernashon.
****
Stratégikamente PAR i PNP mester kuminsá amplia nan potensial di forma koalishon alternativo i riba término korto di amplia e koalishon pa mitigá e posishon di poder di e renchi mas suak den e kadena. Si a faya na mira ta den kiko nan tabata bai hinka nan kurpa, por lo muy ménos, e realidat di awe mester sirbi komo insentiva pa trese korekshon.
****
For di yüni 2007 mi a mustra ku na di promé lugá nos tin ku un mayoria mínimo (11 for di 21) ta konta ku e riesgonan di naturalesa (ku ta pafó di esfera di kòntròl polítiko) ku por konbertí e mayoria den un situashon di “patstelling” (10 kontra 10) òf un minoria (mas ku un kaso di insidente di índole natural). Si te awor aki koalishon a keda liber di efektonan di naturalesa manera malestar, ta nifiká ku e probabilidat di su okurensia a oumentá. Esei kier men ku nèt awor ku kos ta bai pèrta, koalishon lo por keda sin por forma un mayoria.
****
Mi a splika tambe ku no tin kestion di homogenidat den e koalishon. Mi a mustra ku insistensia riba e realidat di “botsende bestuursculturen” entre PAR i FOL. Un ponensia ku básikamente a keda komprobá pa akshonamentu di miembro di e propio Bestuurscollege. Diputado entrante pa PAR, Mike Willem MBA a anunsiá públikamente ku e ta bai entamá un evaluashon di e nombramentunan na por ehèmpel DOK ku e mira pa anulá apuntamentu di gerente den pitu. Diputado pa PNP, Humphrey Davelaar, tabata mes un kla den su promé intervenshonnan riba nombramentu na Selikor, kaminda diputado pa FOL, Anthony Godett tabata persona klave.
****
Otro atvertensia ku mi a manda for di un aña pasá tabata ku koalishon mester tene bon na kuenta ku no ta tur kos por bai ku “hoofdelijke stemming” i “Stemmotivering” komo instrumento di intimidashon polítiko (ku esei mi kier men ku miembronan di koalishon ta sinta ku nan ta wòrdu vigilá). Mi a splika ku ora ku bo provoká hende ku tin kos bou di kueru, bo ta saka spiritu for di bòter ku bo lo no por dominá. Ku awe tin diputado di PAR ku ta pone peso polítiko den balansa pa forsa koalishon den e direkshon ku e ta deseá, mester ta un “teken aan de wand”.
****
Otro punto ku mi a mustra riba dje ta ku durante di un reunion públiko, kaminda tin kosnan bou di kueru, “coming out” di kualke polítiko ta provoká reakshon inesperá, kaminda uso òf mal uso di inmunidat polítiko ta habri kaminda pa sakamentu di puitunan fastioso for di bou di makutu. Pues, ta masha mal idea pa romantisá propio miembronan i sigur amigunan di ayera ku a bira enemigu di momentu. Komunidat lo por bira víktima di falta di wesu di lomba pa karga konsekuensia di mal wisio polítiko.
****
Laga mi ripití un ponensia ku algun amistat di mi lo rekonosé hopi bon. Damas i kabayeros, polítika ta keda un área di akshon humano kaminda pa konsentrashon di hende ku mas ambishon ku e promedio, partinan mas skur di alma di hende ta bini na superfisie. Leinan di komportashon humano ta mustra ku un adulto su struktura di personalidat difísilmente por wòrdu kambiá. Ta sirkunstansia di momentu ta pone ku sierto tendensia den komportashon ta yega mas tantu na superfisie.
****
Un kaiman ku a kaba di kome, temporalmente no ta akshoná den forma agresivo, pero e ta keda un kaiman. Na yüni 2007 mi a usa e ehèmpel di Bokito, e gorila ku a bula pasa un “sloot” na Blijdorp i agredí algun hende. E animal a akshoná riba provokashon sistemátiko. Kada bia ku tin un sirko kaminda ta laga animalnan entrená, hasi kenshi, e riesgo di desgrasia ta presente, pasobra e animal ta keda lokual ku e ta, un animal.
****
For di yüni 2007 mi ponensia tabata ku den e Bestuurscollege, lòs di e kestion di “botsende bestuursculturen”, tin “botsende persoonlijkheden”. Tin strukturanan di personalidat ku bou di sirkunstansia ideal lo por traha ku otro sin insidente. Pero ora bo tin “botsende bestuursculturen” kombiná ku “botsende persoonlijkheden”, bo tin un meskla di ingrediente ku tardi òf trempan lo kousa un eksploshon.
****
Lei di Murphy ta basa su mes riba e echo ku ora ta trata di fenómenonan (kontrali na prosesonan den físika) bo por posponé un “wetmatigheid” pero ku bo no por evit’é. Bo no por krea i mantené un situashon kontrolabel manera ta e kaso den un laboratorio. A ménos ku tin eksepshon den e komportashon di e seksonan, sera un hòmber i un muher huntu, tardi òf trempan ta resultá den sierto aktonan.
****
P’esei mi a skirbi na yüni 2007 ku mi no tabata mira for di unda ta bini ku e pretenshon òf ke krea e persepshon ku si bo pone un grupo di parista den un koalishon ku polítikonan ku e mesun paristanan a kalifiká komo “ongewenste bestuurscultuur”, bo a krea un situashon di laboratorio, ku PAR ta kontrolá. Mi pregunta kategóriko tabata, kiko a pasa ku kreashon ku lokual a frakasá ruidosamente algun aña atras direpente awor si por funshoná?
****
Pues no ta awe pa kumbinensia òf un òf otro insidente mi ta hasi e opservashonnan ku mi a bini ta hasi. Lokual ta pasa ta ku despues di alertá, atvertí i konsehá e echonan, ta motibu ku mi ta denunsiá na solamente e echonan reprochabel, pero tambe esnan ku mester tabata sa mihó, sa mihó i te ku dia di awe no ta intervení den un práktika konsistente di mal gobernashon.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.