MERKA, - Barack Obama ayera a alkansá un hit importante pa bira e kandidato presidensial demókrata na Merka, pero su rival Hillary Clinton a ninga retirá.
Obama a sigurá dilanti su simpatisantenan ku e ta hopi serka di alkansá nominashon di Partido Demókrata.
El a hasi su afirmashonnan na momentu ku proyekshonnan ta dun’é viktoria kla den e elekshonnan primario na Oregon, apesar ku na Kentucky el a keda derotá ampliamente pa su kontrinkante senador Hillary Clinton.
E dos kandidatonan aki a repartí viktorianan den e elekshonnan primario ayera: Obama a gana kómodamente na Oregon i Clinton a gana na Kentucky, loke lo duna Obama mayoria den delegado eligí den e prolongá bataya elektoral estado pa estado.
E senador pa Illinois ta spera ku esaki ta suponé inisio di fin di e kampaña largu, i a pone su atenshon riba un posibel konfrontashon ku republikano John McCain den e elekshonnan general di novèmber.
Obama a tene su diskurso dilanti un grupo grandi di simpatisante. Sin embargo, e no a hasié na Oregon, kaminda a vota via e-mail.
E bia aki el a skohe Iowa, kaminda el a logra su promé viktoria den e karera pa nominashon demókrata 3 di yanüari último.
“Nos a regresá Iowa ku un mayoria di delegado eligí pa pueblo merikano i boso a pone nos na alkanse di e nominashon presidensial demókrata na Merka”, Obama a bisa meimei di gritunan den un enkuentro polítiko na sentro di Des Moines, kapital di e estado.
E senador di 46 aña a regresá n’e tema di kambio ku a pon’é na frente di e karera demókrata den e promé votashonnan, i el a kalifiká e bataya kontra McCain komo “mas di e mesun kos kontra e kambio. Ta pasado kontra futuro”.
Pero Clinton no a duna señal di ta prepará pa retirá, primintiendo su partidarionan na Kentucky ku e lo sigui lucha te ora e elekshonnan primario demókrata terminá 3 di yüni.
“Lo mi sigui defendé nos opshon te ora nos tin un nominado. No ta importá ken esaki ta”, el a bisa.
“Nos tin ku eligí un kandidato ku ta mihó situá pa gana na novèmber i un hende ku ta mihó prepará pa konfrontá e enorme desafionan di e tempu difísil aki”, e dama senador pa New York i eks Promé Dama merikano a bisa su partidarionan na Louisville.
Inkluso despues ku a konta e votonan di ayera, Obama lo bai tin mester di mas o ménos 70 delegado di e 2.026 nesesario pa gana e kandidatura presidensial den e konvenshon demókrata na ougùstùs.
Tòg, ta spera ku e kantidat di delegado eligí lo yud’é haña mas superdelegado indesiso, dirigentenan di e partido ku por apoyá kualke kandidato.
Number mágiko
“Ni senador Obama ni ami a alkansá e number mágiko ora e votashon terminá 3 di yüni”, Clinton a bisa relashoná ku e kantidat di delegado nesesario pa gana e nominashon. “Asina ta ku nos partido lo bai tin ku tuma un desishon duru”, el a añadí.
E kolaboradónan di Obama a bisa ku lo por alkansá e sifra aki ku un seri di apoyo di superdelegadonan den simannan benidero.
A sobra tres elekshon primario: Puerto Rico 1 di yüni, Montana i Sur Dakota 3 di yüni, ku 86 delegado den wega.
E sondeonan na pia di urna na Kentucky a mustra ku Clinton a gana mas ku 70% di voto di votantenan blanku i tres kuart di esnan ku no a terminá edukashon superior.
Mas o ménos 20 porshento a bisa ku rasa tabata un faktor na momentu di vota, similar n’e porsentahe di siman pasá na West Virginia, kaminda Clinton a derotá Obama.
Un rekuento di delegado di MSNBC a duna Obama 1.954 frente 1.783 di Clinton.
Obama tin 1.636 delegado eligí, superando mayoria establesé na 1.627.
E éksito di Obama a keda impulsá pa su rekoudashon rèkòrt di fondonan.
Na aprel el a informá ku a reuní 31.3 mion dollar, sifra inferior n’e 42.8 mion dollar ku el a risibí na mart.
Obama tabatin 37.3 mion dollar na banko pa finansiá su kampaña, su komando a informá.

Foto: Barack Obama 2105

Barack Obama, di 46 aña, ta zuai man p’e multitut despues ku el a papia durante su kampaña ayera na Des Moines, Iowa.

Foto: Barack Obama i yunan 2105

Barack Obama na Des Moines, Iowa, huntu ku su yunan muhé Malia di 9 aña, na man robes, i Sasha di 6 aña, na man drechi.

Foto: Simpatisantenan di Barack Obama 2105

Barack Obama ta saludá su simpatisantenan na Des Moines, Iowa.

Foto: Hillary Clinton 2105

Hillary Clinton, meimei di su siguidónan na Louisville, Kentucky, huntu ku su esposo eks Presidente merikano Bill Clinton, man robes, i nan yu muhé Chelsea, man drechi.

Foto: Hillary Clinton 1 2105

Hillary Clinton ta dirigí palabranan na su simpatisantenan na Louisville, Kentucky.