WILLEMSTAD - Jacco Swart direktor general di N.E.C. a presentá un aliansa ku lo dura 3 aña entre e partnernan: N.E.C., Fundashon Bon Intenshon i Nederlands Antilliaanse Voetbal Unie (NAVU).
Ku e kombenio aki 3 pa 5 futbolista talentoso di Kòrsou entre e edat di 14 pa 20 aña ta haña e oportunidat pa desaroyá nan mes na e skol di futbòl N.E.C., ku e meta final pa bira un profeshonal.
N.E.C. ta brinda e hóbennan aki un famia kaminda nan por hospedá serka dje. Tambe N.E.C. ta sòru pa un estudio ku ta kuadra ku kada hóben i tambe lo duna nan e guia sosial nesesario.
Meta di e di dos parti di e kombenio ta pa medio di e yudansa ku N.E.C. ta duna mehorá e struktura di futbòl na Kòrsou.
Pa hasi esaki posibel un entrenadó di N.E.C. lo bin Kòrsou tur aña pa algun siman i lo duna un man na e futbòl Antiano.
Un otro parti importante di e aliansa ta patrosinio di e parti dilanti di e kamiseta di N.E.C. pa tur tim di N.E.C.
E patrosinio kamiseta tin komo meta pa duna yunan di Kòrsou bibá na Ulanda e sintimentu di orguyo i di otro banda krea un imágen positivo di Kòrsou na Ulanda.
Gobièrnu Ulandes tin hopi atenshon i interes pa e aliansa aki.
Minister Presidènt Jan Peter Balkenende a felisitá e tres partnernan den e proyekto aki pa medio di un karta.
El a skibi entre otro: “Durante mi bishita na Kòrsou mi a tuma nota personalmente kuantu futbolista talentoso tin riba e isla. Ta importante pa e hóbennan aki haña oportunidat di desaroyá loke nan ta bon den dje. Ekselensia no ta bai sin invershon. N.E.C. huntu ku su partnernan lo perkurá pa talentonan hóben di Kòrsou haña mas i mihó oportunidat pa desaroyá nan mes. Abo a demostrá kuantu forsa positivo tin skondí den futbòl. Abo a demostrá ku futbòl ta uní hende ku otro. I abo a demostrá ku nos ta yega leu huntu si nos respetá i sostené otro.”
Inkluso e Alkalde di Nijmegen, Mr. Th. C. de Graaf a ekspresá su felisitashon na N.E.C. pa medio di un karta: “E klup i su partnernan ta bai yuda hóbennan talentoso desaroyá i yega e nivel máksimo. Un inisiativa bunita ku ta fortalesé e laso spesial den reino ulandes. N.E.C. ta demostrá ku esaki, ku e ta sinti su mes responsabel pa ku komunidat, hasta ora ta trata di krusa oséano. Mi ta orguyoso ku Nijmegen tin un klup di futbòl asina fantástiko”.
E tres partnernan ta hopi entusiasmá ku e aliansa i ku tur e oportunidatnan ku e ta trese kuné.
Presidente di NAVU señor Jean Francisca: “E proyekto aki ta brinda oportunidatnan ekselente pa por traha den un forma struktural pa subi e kalidat di futbòl na Antia. Tur aña 3 pa 5 hungadó lo haña e chèns pa purba nan suerte na e organisashon N.E.C. Banda di esaki tin e oportunidat pa traha riba e desaroyo di nos entrenadónan. Un entrenadó di N.E.C. lo biaha pa Kòrsou tur aña pa kontribuí na e futbòl Antiano.”
Fundashon Bon Intenshon ta e fundashon di sr. Gregory Elias.
E fundashon a kreá den último añanan e.o. skolnan di kòmpiuter, a kuida personanan infektá ku e vírus di HIV i a asistí algun hóben ku ta studia na Ulanda i Estádos Unídos. Na 2003 e fundashon a organisá un kampaña pa trese hóbennan Antiano den un forma positivo den publisidat pa duna nan e sosten nesesario. Pa e proyekto aki Elias a risibí Pluma di Plata 2003.
Tokante di e aliansa ku N.E.C. i NAVU Gregory ta bisa: “Mi ta sinti mi mes komprometí ku mucha i hóben: futuro ta di nan. Ku e aliansa aki mi ta spera di duna sosten na muchanan Antiano i mi ta spera ku dor di tin chèns igual nan tambe por presta bon. E aliansa a inisiá for di inisiativa di Leen Looyen i mi mes persona. Ku mi tin un sintimentu spesial pa futbòl ta bisto. Ku deporte nos ta krea komprenshon pa otro, hermandat i union. Esaki por kontribuí enormemente ku lokual ku mi ke logra, lokual ta duna hóbennan oportunidat i pone Kòrsou na e lugá korekto riba mapa.”
N.E.C. ta orguyoso ku e aliansa vigente pa e 3 siguiente temporadanan.
Direktor general Jacco Swart ta bisa: “Nos a drenta den kontakto ku Gregory Elias via di nos kabesante di scouting i direktor di tékniko aktual Leen Looyen. Banda di esaki Leen Looyen ta guia e selekshon di futbòl di Antia Ulandes. Pa N.E.C. ta algu fantástiko ku Leen a inisiá ku e kontakto i e ta mustra ku e ta un berdadero N.E.C.’er. Esaki ta un aliansa úniko na Ulanda i kisas den eksterior tambe. E ta kuadra presis ku N.E.C. pasó nos ta un klup komprometé ku komunidat. Ya kaba tin un tim di N.E.C. enkargá pa guia e proyekto aki i pa sigurá ku tur kos lo kana bon. Nos ta sumamente orguyoso ku minister presidènt Balkenende i Alkalde de Graaf di Nijmegen a manda un karta personalmente den kua nan ta felisitá Fundashon Bon Intenshon, NAVU i N.E.C. ku e kombenio aki. Tin hopi trabou pa hasi, pero esaki lo bira un éksito sigur”.
E aliansa entre N.E.C., Fundashon Bon Intenshon i NAVU na promé instante ta vigente pa un temporada di 3 aña, kuminsando promé di yüli próksimo.