DURANGO, Mexico, - 8 Persona a muri den un konfrontashon entre supuesto gruponan rival di narkotrafikante na estado di Durango, situá nortost di Mexico.
Prokuraduria General di Hustisia di e estado (PGJE) a informá ku a registrá e echonan ayera mardugá na munisipio di Vicente Guerrero, situá 80 kilometer di e siudat di Durango.
Segun e promé vershonnan, e tiroteo a dura kuater ora, ounke fuentenan ofisial di Durango a konfirmá ku e konfrontashon a dura 40 minüt.
Na e lugá a desmantelá 12 vehíkulo, armanan di poder haltu, kartuchanan, i unifòrmnan di kamuflahe.
No a identifiká identidat di e viktimanan, i outoridatnan no a informá riba presensia di heridonan.
Durango ta un estado kaminda no ta eksistí refuersonan di Ehérsito i polisnan federal, den e inisiativa lansá pa Gobièrnu kontra krímen organisá, ounke despues di e konfrontashonnan trupanan a trasladá bai n’e zona, pa yuda den operativonan di búskeda.
P’e violensia inkontrolabel ku ta tumando lugá na diferente region di Mexico, Presidente mèksikano Felipe Calderón a sigurá ku e lucha kontra krímen organisá “ta serio!”
Pa loke ta trata e aña aki, mas ku 1.000 persona a muri debí n’e konfrontashonnan entre supuesto gruponan di narkotrafikante i forsanan federal.
Na Ciudad Juárez, na frontera ku Merka, e presensia militar ya tin mas ku un luna einan, pero no por a logra frena e nivel di violensia.
Djadumingu último, direktor di Seguridat Públiko di e siudat, Guillermo Prieto, a renunsiá, despues ku a menas’é ku morto.
E direktor nobo di polis ta Roberto Orduña Cruz, un eks militar.
Di akuerdo ku korant El Diario de Juárez, fuentenan di polis munisipal a informá ku Prieto a bai Merka via frontera i a pidi asilo polítiko n’e pais aki, pa temor ku lo por mat’é.

Foto: Mexico 2105

Polisnan federal a sera e área despues di konfrontashonnan ku tiru na estado di Durango, Mexico.

Foto: Guillermo Prieto 2105

Guillermo Prieto, direktor di Seguridat Públiko di Ciudad Juárez.