Mr. prof. dr. Lorito ta yama tur hende un felis djarason. Ta masha kos tin di konta. Ketu bai nos ta hañando pabien for di diferente fuente pa loke ta trata e kaso den Korte. Ta bon pa Lorito ripití, ku e kaso no ta kontra e persona en kuestion, pero mas bien riba e márgen ku medionan tin pa publiká (denunsiá) kosnan ku ta bon pa públiko sa. Esei ta esensia di e kaso!
*********
Shon Gerrit a sulfurá ayera den Konseho Insular. Nos a tuma nota di su deklarashonnan (nos mes a skucha nan!) i nos ke bisa, ku nos sigur no ta den ningun kòmplòt pa tacha nòmber di niun hende!
*********
Nos a haña diferente opinion i komentario for di un gran kantidat di sírkulo. Remarkabel ta, kon hende a biba ku e kaso, tantu di tòp di nos komunidat komo e hende den funshonnan mas abou (por sierto pa nos tur ta igual). Nos ta señalá e aspekto aki, pa mustra ku e kaso aki sigur a haña atenshon tur kaminda. Nos no tin masha espasio awe, pero mañan nos lo reprodusí diferente di e komentarionan ku nos a haña i nos lo publiká sin nòmber pa protehá esnan ku a komentá.
*********
Miéntras tantu preis di krudo merikano pa entregá riba término a marka awe un máksimo históriko di 130,30 dollar pa barí, respaldá pa un dollar debil i preokupashon riba e suministro. Miéntras tantu, tabata negoshá e krudo Brent di London na 129,55 dollar pa barí. Na Kòrsou ketu bai nos ta kere nos por skapa. Shonnan, un biaha mas, kuminsá ahustá, pasobra no tin moda di hasi!
*********
Charles a bin ku un plan pa bende e Refineria. Ta bale la pena diskutí e plan aki i awor kiko ta su méritonan. Charles a haña masha invitashon di diferente gremio pa bin splika su idea, loke ta un indikashon, ku den e gremionan aki tambe nan ta konsiderá ku ta un asuntu serio. Nos kier rekomendá Charles un kos so: papia riba e plan i no menshoná kosnan rondó di dje ku ta zona manera hasimentu di polítika. Lógikamente ta polítiko e ta, pero segun nos, un plan serio ta zona mas serio si kita e aspektonan polítiko afó. Asuntu ku nos ta bendiendo barata ku Ulanda ta desbaratá kualke diskushon riba kualke plan!
*********
Lorito a pasa mira un par di hende importante ta warda riba un reunion na BC. Lorito di, ku nan tin hopi pasenshi. E diputadonan, un di nan partikularmente, mester siña yega na tempu. E kos no ta keda bon! Nos a tuma nota tambe, ku na final tabatin hopi tenshon i nos a haña tur detaye. Keda pendiente pa nan!
*********
Un pabien awe pa Banco di Caribe ku a kumpli 35 aña. Awe ta dia di e bolo grandi, ku segun e bosero di e banko a splika ta grandísimo. Lorito lo pasa bula pa wak kiko ta kiko!
*********
Nos ta keda te aki awe. Kòrda kuida kurpa, resa hopi pasobra nos mester di dje. Te mañn ku Dios su poder!