WILLEMSTAD – Lider di MAN Charles Cooper ta haña, ku e mester a duna sosten den Korte na su miembro Gerrit Schotte. “E ta un miembro prominente di nos partido, mi mester t’ei p’e”, asina Cooper a bisa LA PRENSA den su promé deklarashonnan riba e kaso den Korte.
Manera nos a informá, Schotte a pèrdè e kaso di rektifikashon ku el a kuminsá den Korte kontra LA PRENSA i BALA.
Loke a hala atenshon durante tratamentu di e kaso, tabata presensia di lider di e partido Cooper i otro miembronan di e partido, tantu durante tratamentu di e kaso komo e veredikto di djabièrnè último. Es mas, den Korte por a mira ku Cooper tabata duna sosten aktivo na Schotte ku anotashonnan (“kattebelletje”) ku e tabata manda for di patras di sala pa Schotte.
Cooper a bisa, ku Schotte tin un libertat individual pa bai Korte. “E mes a informá nos for di kuminsamentu di e kaso riba e problema ku a surgi ku e kompania di seguro. Ora ku e kaso a kuminsá, nos a disidí ku nos mester t’ei, komo ku e ta miembro prominente di e partido”, asina Cooper a bisa. Den e elekshonnan di aña pasá, Schotte tabata e di dos vote-getter mas grandi di e partido blou.
Riba e pregunta ki relashon e tin ku Schotte, Cooper a bisa ku Schotte ta un amigu di dje. “Nos a traha huntu den Bestuurscollege i un tradishon ta, ku tur hende ku mi traha kuné, mi ta konsiderá mi amigu, meskos ku por ehèmpel Nelson Pierre”, asina el a bisa.
Finalmente Cooper a bisa, ku e no a duna komentario mas promé riba e kaso komo ku e kaso tabata “sub judice”, esta ku e tabata den konsiderashon serka wes. Cooper a bisa, ku lo sigui sostené Schotte den e próksimo pasonan ku e tuma.
Ayera den un reunion públiko di Konseho Insular, Schotte a kritiká e loke el a yama “kòmplòt” ku tin kontra dje. Segun e polítiko di MAN, esei ta resaltá klaramente for di despues ku el a bai MAN aña pasá i hiba un kampaña aktivo. El a menshoná e publikashonnan rondó di uso di credit card ku el a surpasá ku 8 florin i paga bèk, e avisonan di televishon den kampaña ku algun komersiante a graba kontra dje ku uso di algun suidadano i awor e publikashonnan den prensa. Schotte a bisa, ku no opstante tur kos, e ta den sala di reunion pa sali na interes di su votadónan i pueblo en general.