DUESSELDORF, Alemania – Juan Ignacio Chela djamars a derotá Wayne Odenik i Argentina a parti honor den su duelonan singel kontra Merka pa Kopa Mundial pa ekipo di tènis.
Chela a gana 7-5, 6-1 riba Odesnik, miéntras ku e argentino Guillermo Cañas a pèrdè 7-6, 6-4 kontra e merikano James Blake.
E seri pa Grupo Kòrá entre Merka i Argentina, kampion defensor, lo keda disidí awe den e partido di dòbel. E argentinonan mester gana e partido aki pa no keda eliminá.
Argentina a kai 2-1 djamars kontra Suesia, ora Chela a kue e úniko punto di e tim suramerikano den su wega kontra Thomas Johansson.
Suesia a bari Repúblika Cheko pa saka un bentaha inalkansabel den e seri ei i keda na punta di e Grupo Kòrá. Robin Soderling a dal Tomas Berdych i Johansson a superá Michael Tabara.
Suesia i Repúblika Cheko ta hunga e dòbel awe.
Merka a gana Repúblika Cheko djaluna 2-1.
Den Grupo Blou, Alemania i Spaña a gana e promé weganan singel kontra Italia i Rusia, respektivamente.
E aleman Philipp Kohlschreiber a gana 6-2, 7-6 di Potito Starace i e spañó David Ferrer a vense Mijail Youzhny.
Alemania a dal Spaña 2-1 i Rusia a vense Italia den e promé serinan di Grupo Blou.
E ocho timnan ta parti den dos grupo i e torneo ta hunga un sistema nobo. Kada seri ta konsistí di dos wega individual i un dòbel parti riba dos dia, loke ta garantisá ku e ekiponan lo mira akshon tur e dianan di e etapa di tur kontra tur. E ganadónan di kada grupo lo topa den e final di djasabra.
E aleman Nicolas Kiefer i e italiano Simone Bolelli lo hunga e wega individual djarason i despues Aleman ku Italia ta hunga e dòbel.
Ademas, e spañó Feliciano Lopez lo topa e ruso Igor Andreev, promé ku e wega dòbel di nan pais.