WILLEMSTAD – Playstation 3, X-box 360 i WII, ta algun wega di kòmpiuter ku ta kontené material venenoso. Esaki ta loke un investigashon di Greenpeace a duna komo resultado. Den algun di nan tabatin kímiko, ku Komishon Oropeo ya a prohibí pa usa den ko’i hunga.
Weganan di kòmpiuter no ta kai bou di ko’i hunga, pero segun Greenpeace nan ta sumamente popular bou di mucha. Pa e motibu akí Greenpeace ta urgí e produktornan di weganan di kòmpiuter pa hasi nan produktonan liber di venenu. Tur e tres weganan di kòmpiuter ku Greenpeace a tèst tabatin venenu den e material. Ounke ku e tèst a indiká tambe, ku e fabrikantenan no ta usa e material venenoso den sierto partinan. Remarkabel ta, ku kada marka ta traha otro partinan di e weganan si material venenoso. Greenpeace ta bisa, ku e tèst a demostrá, ku ya por traha kasi tur e partinan di e weganan ku material ku no ta venenoso. E lider di kampaña ‘materialnan venenoso’ di Greenpeace Ulanda, Kim Schoppink, a bisa ku Sony, Microsoft i Nintendo mester stòp di hunga wega i sòru pa pone weganan di kòmpiuter sin material venenoso riba merkado.
Den tur e tres markanan a lokalisá hopi di e kímiko ‘broom’, ku ta usa den e material ku mester tarda e proseso di pega kandela. E material akí ta sòru, ku ora e mashin haña un korto sirkuito, e no ta pega kandela mes ora. E konsentrashonnan mas haltu tabata den Playstation 3 i WII. E investigashon a proba tambe ku e X-box 360 i e Playstation 3 tabata kontené konsentrashonnan haltu di loke nan ta yama ‘weekmakers’, un kímiko ku ta prohibí den ko’i hunga. Weekmakers ta stroba hormonanan den kurpa di hende. E tipo DEHP ta stroba e desaroyo seksual di hende i di mamíferonan.
Tur aña ta bende rònt mundu un kantidat di 60 mion wega di kòmpiuter. Huntu e weganan akí ta kontené un kantidat enorme di produktonan venenoso. E venenu ta skapa durante produkshon, uso i den e fase kaminda ta resiklá e sobrá. Hopi weganan di kòmpiuter ta resultá finalmente den paisnan den desaroyo, kaminda trahadónan sin medidanan di seguridat ta destruí e material. Di e manera akí nan ta eksponé nan mes na un kòktel di material venenoso, loke ta kondusí na problemanan di salú i di medio ambiente. E investigashon di Greenpeace pa detektá material venenoso den weganan di kòmpiuter, ta parti di un kampaña pa hasi e industria di elektrónika liber di venenu. Banda di esei Greenpeace ke pa tur fabrikante di elektrónika, kolekshoná nan produktonan ku no ta sirbi mas i resiklá nan na un manera responsabel.