Parlamentario Zulay van Poppel-Marquez ta propone

ORANJESTAD– Den su comunicado di prensa Parlamentario Zulay van Poppel-Marquez ta reflexiona riba consecuensianan di nos lifestyle insaludabel, y e ta comparti su pensamento cu nos comunidad.
Laga nos para keto un rato serca e consequensianan di e malesanan cronico como resultado di un estilo di bida insaludabel:
a. E placer di bida ta baha pa e pacient y su costonan di bida relaciona cu e malesa ta subi.
b. Productividad di e paciente como empleado den un empresa o organisacion ta baha.
c. E miembronan di famia cu tin cu cuida pa e pacient ta haya un carga emocional extra.
d. E gastonan di uitkering loonderving di SVB pa dianan malo ta aumenta.
e E gastonan medico cu AZV tin cu cubri tambe ta aumenta.
f. Nos economia, nos comunidad y tur su miembronan ta sinti y paga pa e consequencianan menciona.
CAMPAÑA NACIONAL
Aruba mester bai pertenece otrobe na e miho paisnan riba tereno di salubridad den e continente mericano. Con nos ta bai haci esaki. Parlamentario Zulay van Poppel-Marquez ta papia di nos pasobra esaki no ta un responsabilidad di gobierno so. Berdad ta cu nos Constitucion ta indica den Articulo V23 promer inciso cu Gobierno ta tuma precaucion pa promove salubridad publico. Vab Poppel-Marquez ta cita: ”De regering treft maatregelen ter bevordering van de volksgezondheid.” Pero e cifranan ta indica cu e salud di cada un di nos como cuidadano di e pais Aruba ta depende en gran parte di nos estilo di bida y esey kier men cu ta cada uno di nos ta den prome luga responsabel pa nos propio salud. Bo salud ta di bo, cuid’e.
Zulay ta propone un campaña cu ta bai promove un estilo di bida mas saludabel pa tur e habitantenan di nos comunidad poniendo atencion riba e sigiente instrumentonan: a. Informacion/Comunicacion; b. Incentivonan financiero; c. Legislacion y d. Facilidadnan.
INFORMACION/COMUNICACION
Un campanja di informacion pa concientisa nos comunidad ta importante y por keda ehecuta door di direccion di Salubridad publico.
INCENTIVONAN FINANCIERO
Subsidio ta un forma di incentivo financiero. Mi ta pensa den direccion di nos agricultornan di berdura. Den parlamento nos fraccion ta sostene e ampliacion di e canasta basico cu fruta y berdura frozen y den bleki. Den futro por bin cu fruta fresco den e canasta basico. Belasting, y mas specifico accijns tambe ta incentivonan financiero pero nos por usa nan pa demotiva nos cuidadonan pa huma y usa alcohol. Mas facilidadnan deportivo y fietspaden riba cierto ruta tambe por yuda.
LEGISLACION Y REGLAMENTACION
Na New York nos a wak cu aña pasa a bin cu un ley cu ta prohibi restaurantnan pa usa cierto vet den nan cuminda y e aña aki nan a pasa un ley cu ta exihi di restaurantnan pa menciona e cantidad di vet cu cada cuminda riba nan menu tin. Ora di desaroya legislacion nobo semper tin di wak si esaki ta ehecutabel y no ta bai causa mucho burocracia. Pesey ta importante pa tene e legislacion semper lo mas simpel posibel, locual ta minimalisa e gastonan pa gobierno, sector priva y e cuidadanonan. Den parlamento nos a duna sosten na e maneho di gobierno pa duna atencion na come saludable na schoolnan. Por mira cu a cuminsa bende juice y sandwich na diferente school eliminando soft drink y pastechi.