Donny Rasmijn di partido AVP ...Reconstruccion di nos pais ta prioridad pa AVP 

ORANJESTAD- Donny Rasmijn di partido AVP ta comenta cu nos pais a bin ta hayando un golpi fuerte durante e ultimo 7 añanan bou gobernacion di partido MEP. Nos hendenan a bin ta sufriendo un perdida gigantesco di poder di compra durante e gobernacion impopular di partido MEP.
Cu e ingreso cu nos pais tin nos mester ta hopi bon para den sector di educacion, social, hudicial, infrastructura, medico y medio ambiente, Rasmijn ta duna di conoce.
Den sector di educacion por ripara cu mas mucha ta drop out for di scol y mayoria vez ta dor di problemanan social. Pa e cantidad di problemanan aki nos mester pensa den pone trahadornan social y muy probablemente psicologonan na nos scolnan.
Riba tereno hudicial nos pais ta pasando den su peor momentonan. No tin suficiente polis, dunando malhechornan hopi espacio pa comete delincuencia.
Tambe politica a infiltra den nos sistema hudicial unda cu ta depende ken bo ta bo ta wordo persegui dor di Ministerio Publico of no.
Den infrastructura ningun desaroyo of solucion tin riba mesa pa e crecemento den vivienda y pa careteranan cu ta necesario pasobra e poblacion ta sigui crece. Mantenimiento di careteranan y proyectonan chikito so ta tumando lugar. E tan necesario “Vierbaanseweg” ainda no a duna luz mientras cu e trafico na Aruba ta keda tranca. Mudamento di waf grandi pa Barcadera tambe ta para pasobra diferente ministernan a haci acuerdonan cu diferente companianan y awor nan mes ta bringa otro pa wak ken ta haya e contract.
Riba tereno medico cada dia e situacion ta bira mas malo. Actualmente hopi famianan Arubiano mester spaar placa pa nan por busca nan salud na Venezuela, Colombia of Republica Dominicana mientras cu nos pueblo ta pagando un dineral pa servicio medico. Den ramo di medio ambiente a bin un par di proyecto cu a costa mas cu 50 miyon florin na Parkietenbos mientras cu no tin nada construi riba e tereno ainda. Serlimar a wordo decreta como un compania priva, pero mester wordo yuda tur aña cu por lo menos 20 miyon florin dor di gobierno.
Esaki ta un relato chikito di e tanto desgracia cu nos pueblo ta sufriendo na man di e gobernacion actual di MEP cu si ta para fuerte pa conserva e rikesa y bienestar di nan Friends and Family. Mientrastanto partido AVP a prepara su mes pa tuma gobernacion over cualkier momento cu pueblo ta desea.
“Nos prioridad ta bai ta pa reconstrui tur e dañonan cu e gobierno actual ta haciendo na nos pais y tambe pa duna pueblo locual cu e merece. Ta hopi placa tin den circulacion y ta hopi trabou tin na Aruba mientras tin hopi famianan ta pasando momentonan dificil pasobra nan no por haya un trabou. Si nan ta sinti nan mes malo nan mester busca ayudo di comunidad pa bay un dokter den exterior of nan mester warda te ora cu nan ta casi morto pa AZV por mandanan afor pa atencion medico”, Donnny Rasmijn ta comenta.