WILLEMSTAD – E sindikato STrAF tin derechi pa representá wardadónan di prezu den Bon Futuro. Esaki ta loke un hurista a konkluí den un konseho pa minister di Hustisia David Dick. Dick a laga e hurista traha e konseho despues ku ABVO a insistí riba esaki.
LA PRENSA a komprondé for di un fuente, ku ta for di 2006, ora ku e sindikato STrAF a drenta Bon Futuro, ku ABVO a kuestioná presensia di STrAF. ABVO lo tabata di opinion, ku sindikato STrAF su statutonan tabata duna solamente espasio pa representashon di trahadónan den fiskalia, i konsekuentemente STrAF no por a representá niun wardadó di prezu. Pa haña klaridat riba esaki, ABVO lo a pidi minister di Hustisia David Dick pa laga studia e statutonan di STrAF, pa asina yega na un konklushon. LA PRENSA a komprondé ku un hurista a hasi esaki i a konkluí ku debidamente e statutonan di STrAF ta pèrmití pa representá trahadónan den Bon Futuro.
LA PRENSA su fuente a indiká, ku e sindikato STrAF lo ta di opinion awor, ku a pèrdè masha hopi tempu balioso den pasado diskutiendo i awor tòg ta resultá ku nan ta pèrmití pa representá e trahadónan. LA PRENSA a komprondé tambe, ku ABVO no tabata ke sinta na mesa ku STrAF, pasó ABVO no tabata rekonosé e sindikato. Dor di esaki tabata difísil pa traha na bienestar di e empleadonan di Bon Futuro. Parse ku STrAF ta di opinion, ku for di e tempu ei por a hasi hopi kos di un otro manera, si no tabatin e problema akí ku a originá serka ABVO. Finalmente STrAF lo tabata ke pa ABVO públikamente rekonosé nan komo sindikato awor ku e konseho ta konosí. Parse ku STrAF a keda straño, ku minister Dick a keda ketu despues ku el a risibí e informashon akí i ta spera ku e lo publiká esaki.