WILLEMSTAD – Pronto lo bai drecha e fasilidatnan sanitario na aeropuerto di Kòrsou. Banda di esei lo pone tambe bankinan parti pafó di e edifisio. Esei ta loke minister Maurice Adriaens a anunsiá despues ku el a bishitá e kompleho. A base di reklamonan ku el a haña enkuanto e bañonan i fasilidat pa sinta na Aeropuerto Hato, e minister ku ta enkargá entre otro ku aviashon mes a bai tuma nota di e situashon. Mirando e situashon ku ta reina na Aeropuerto inmediatamente e mandatario a instruí Siegfried Fransisco (Direktor di Departamentu di Aviashon) pa tuma kontakto ku esnan enkargá pa laga drecha e situashon. “Ta imposibel ku un aeropuerto di kaliber internashonal ta tene bañonan no limpi i no tin lugá pa sinta. Un aeropuerto mester brinda fasilidat adekuá pa sinta i sigur serka nos na Kòrsou, un lugá pa skonde solo òf áwaseru ora bo ta warda pafó,” asina minister Adriaens a bisa. Den kuadro di esaki Fransisco i Etienne van der Horst (CAP) a hiba kòmbersashon i palabrá ku riba tèrmino korto CAP lo laga drecha e bañonan poniendo mosaiko.Di e forma aki por tene esakinan mas limpi i higiéniko, segun Sr. Van der Horst. Tambe a palabrá ku denter di poko CAP lo laga pone bankinan parti pafó di e edifisio. Minister Adriaens a bisa ku e ta kontentu ku resultado di e kòmbersashon i ta spera ku CAP lo aktua pronto manera palabrá. Riba e pòrtrèt por mira kondishon aktual di un di e bañonan na nos aeropuerto. (Foto eksklusivo: LA PRENSA)