DAVIE, FLA., - Djaluna Juan Carlos Sulbaran a tira su último partido di temporada, ganando un wega di semi final di e torneo estatal di Florida ku skor di 11-6.
Juan Carlos a tira kuater ining fuerte durante kual el a permití únikamente 1 hit, kual tabata un honron solitario.
Den di sinku ining el a konfrontá problema, ora ku el a haña blar i mester a bandoná partido ku bentaha di 9-3.
Djamars anochi American Heritage High School a logra un triunfo di 8-2 riba Fort Pierce pa titulá kampion di e estado di Florida. Nan a keda nominá e High School number unu di Merka.
Juan Carlos tabata klave den e éksito di American Heritage. Su tremendo aktuashon i liderazgo a hiba a tim pa promé biaha na e título estatal.
-Juan Carlos a terminá komo Picher Kampion di Broward County ku rèkòrt di 11-0. E no a pèrdè niun wega for di dia ku el a yega Merka na ougùstùs último.
-El a keda nominá pa e premio All Broward County Sportsmen, komo un di e mihó deportistanan di e kondado di Broward. Djaweps 22 di mei e lo risibí su premio.
-Selekshoná den e All Star Team di Florida. Djabièrnè 23 di mei Juan Carlos lo habri e All-Star Game aki pichando pa South Florida.
-Nominá entre e mihó 120 peloteronan di skol na Merka
-El a keda nombrá den Sport Illustrated Top 100, rankeá na di 27 lugá entre e mihó 100 prospektonan di Merka.
Juan Carlos a keda di bini Kòrsou dia 26 di mei awor ora ku skol a kaba pa forma parti di e selekshon di NabaFe ku ta preparando pa partisipá na Haarlemse Honkbal Week na Ulanda.
E ta pendiente tambe pa resultado di e MLB Baseball Draft ku ta tuma lugá dia 5 di yüni awor. Despues di su tremendo temporada e tin speransa ku e por keda di draft den e promé sinku buèltanan.
Si e no keda di draft òf no yega na akuerdo ku un organisashon di MLB, e tin un beka full pagá ku University of Florida, mihó konosí komo Florida Gators, kaminda e lo mester mèldu dia 14 di ougùstùs 2008.
Sifranan di Juan Carlos Sulbaran ta lo siguiente:
El a tira 67 ining, enfrentá 224 batidó, permití 24 kareda, di kual 14 tabata limpi. El a pèrmití 31 hit, 4 honron, regalá 21 base por bola, poncha 88, dal 10 batidó ku bala i a tira 3 wild pitch.
El a kuminsá 13 wega i a gana 11 sin pèrdè.