Skina di Sorti, awe djabièrnè 23 di mei di 2008, ta kuminsá ku deseá tur hende un bon dia. Tin un bòm polítiko, ku destinashon Antia, ta formando den seno di Tweede Kamer, spesífikamente den frakshon di PVV di Geert Wilders, ku pa Kòrsou lo por bai kousa un tsunami polítiko. E insitashon (“directe aanleiding”) ta e kontroversia rondó di Hero Brinkman di PVV i Parlamento antiano.
****
E kontraversianan ku e polítiko ulandes Hero Brinkman di PVV ta na punto di kue un buèlta bastante serio. Segun esnan ku tin akseso na NRC (bo por subi nan website) por a lesa, e kontraversial polítiko Hero Brinkman di PVV tin intenshon di presentá un lista ku nòmber di 37 polítiko antiano ku ta metí ku korupshon. Presentá un lista ku nòmber di hende, ku e kalifikashon di involukrashon ku korupshon no ta algu ku un hende ta hasi sin por supstansiá esaki.
****
Esnan ku ta den e wega di korupshon òf ta move den e sirkuitonan aki, no por tuma e informashon for di NRC komo djis un blòf polítiko. Esnan ku ta bon informá ku e baiben den sirkuito polítiko ulandes sa ku miembronan di Tweede Kamer i sigur esnan ku ta forma parti di sierto komishonnan ta wòrdu informá riba entre otro integridat di gobernashon na Antia.
****
Meskos ku ta sosodé rònt mundu, e ministernan konserní mes ta mantené nan mes na informe general (sin menshoná nòmber), pero ku diverso miembro ta hasi uso di nan konekshonnan pa haña e detayenan di un òf otro informe.
****
E proseso pa hasi uso di informashon optené for di un fuente konfidensial ta ku bo ta bai kana di informashon den direkshon di un fuente(nan) ku bo por divulgá. Si bo haña entrada den ficho di un kaso (“inzage”) bo por kana e kaminda di konopá informashon ku otro fuentenan públiko pa medio di kual bo por traha un relato propio ku ta krea un persepshon basta serka di e bèrdat kontené den e ficho.
****
E informe den NRC, ta laga hopi espasio pa nos pensa ku, e informashon enkuanto aktornan polítiko ku konekshon dudoso, kaminda tin vínkulo ku aktividatnan di korupshon, ta disponé di e informashon relevante, pero ku e polítiko di PVV ta kere di mester di tempu, te ku fin di luna di mei, pa por formulá su denunsia di tal forma ku e no ta komprometé su fuente real di informashon.
****
Mi ke duna e respektivo dirigentenan polítiko den serio konsiderashon pa prepará pa ora e bòm estayá. For di awor nan mester prepará pa e impakto di e akshon di e polítiko menshoná. Naturalmente e posibilidat ku e polítiko di PVV lo desistí di su intenshon tei, pero e no ta e senario ku mester prepará pe. Laga mi ripití ku e táktika di ninga no ta esun di mas sensato. Produsí lista di polítiko metí ku kosnan ku no por lus di dia, no ta difísil. Mi a trata di mustra den introdukshon di e kolumna di awe, ku e miembro di frakshon di PVV tin akseso na informashon konkreto.
****
Informashon di esnan ku tin “oor, oog functie” na Antia, ku ta Marina ta yega sentro di gobernashon ulandes den forma struktural. Tur lokual nos mes ta mira, i skucha pa despues tapa kara, ta aparesé den informe ku ta yega sentro di gobernashon ulandes. E gobernantenan ulandes ta tuma nan Parlamento na serio i ta duna informashon, entre kual esun sensitivo na e respektivo komishon di Tweede Kamer.
****
Zundramentu i agitamentu kontra di “de politiek” ulandes i medionan ulandes, lo no sirbi komo kòrtina di huma pasobra elektorado antiano sa e diferensia entre tiramentu di kos den laria i denunsianan supstansiá. Elektorado sa ku tin diferente aktor polítiko ku orea duru, ku no ke tende i ta pèrsistí na trata di malusá nan posishon, ku ta perhudikando e komunidat. Tur hende tin derecho riba un “second chance”, pero na momentu ku hasimentu di kos malu ku direkshon di kustumber, intervenshon ku man duru ta inevitabel.
****
Un insidente, sigur esnan aisla ta indikashon di e manera ku un hende a atendé ku un determinado situashon. Falta di eksperensia, traishon òf mal uso di konfiansa ta elementonan ku por a kondusí na e insidente. Pero ora tin historial di sierto tipo di kaso, nan ta indikashon di karakterístika di personalidat di un hende.
****
Ayera mi a skirbi ku den e konstelashon na nivel insular, e deterioro den kalidat di gobernashon ta indikashon ku esnan ku por mihó a bai atras i ku dirigentenan tin di karga responsabilidat pa e fayo den maneho di nan rekurso humano. Si bo sa ta na kual peliger bo ta bai eksponé esnan ku bo apuntá, un di e kriterio di selekshon mester ta e lokual nan ta yama “weerbaarheid” di e kandidato pa e lokual e ta wòrdu eksponé na dje.
****
Mi a splika na vários okashon ku aserkamentu stratégiko di fenómeno ku su forsanan propulsor (“driving forces”) no ta bou di bo esfera di influensia ta esun di fleksibilidat. Pues si bo no por kambia esun ku bo tin ku traha kuné, bo mester di hende ku ta evitá situashon kaminda e komportashon indeseá ta tuma lugá. Bo no ta skohe esnan ku ta “back off” si un situashon indeseá presentá.
****
Den Bestuurscollege di Kòrsou ta tolerando kosnan ku no ta kuadra ku reglanan di bon gobernashon. Ta aseptá ku dokumentonan di gobièrnu ta yega den mañan inapropiá. Den Konseho Insular e mayoria ta tolerá ku un miembro di koalishon ta violá regla di órden i ta trapa derecho di ekspreshon liber ku pia. Ta e aktitut aki ta esun ku ta habri kaminda pa “de politiek” ulandes krea instrumento pa intervení.
****
Na diferente okashon tabata tin reakshon fuerte den direkshon di miembronan populista di Tweede Kamer ku a bini ku proposishon insolente manera benta di Antia i spesífikamente Kòrsou na esun ku mihó oferta. Reakshon na nan lugá, komo ku semehante proposishon ta trapamentu di dignidat di un pueblo.
****
Pero di otro banda nos ta keda ketu komo pueblo pa kos mas pió ku ta pasando. Nos ta aseptando ku ta entrega pais na un malestar kanseroso manera ta e kaso ku korupshon. Una bes ku e fenómeno aki plama i bira un elemento sosio kultural, bo no por eradik’é mas. Tur kaminda tin sierto grado di korupshon. Pero esei no ta hustifiká un aserkamentu di toleransha. E aserkamentu mester keda unu kombatiente.
****
Ku tur sinseridat, ami sigur no ta mira e espíritu ei. Mi ta denunsiando lo kontrario. Mi ta denunsiando ku esnan ku a drenta pa kombatí violashon di reglanan di bon gobernashon, ta tolerando práktika di mal gobernashon i inkluso ta sinta mira kon figuranan dudoso ta haña akseso na rekursonan di pais.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.